Muri Nijeri umukandida w'ishyaka riri ku butegetsi Mohamed Bazoum azahatana na Mahamane Ousmane wigeze kuyobora icyo gihugu mu cyiciro cya kabiri cy'amatora ya perezida gitegekanijwe mu kwezi kwa kabiri uyu mwaka. Ibyo biragaragazwa n'ibyatangajwe n'akanama gashinzwe amatora kuri uyu wa gatandatu.
Bazoum yaje ku isonga mu cyiciro cyambere cy'amatora n'amajwi 39.33 ku ijana ntiyabasha kubona amajwi 50 ku ijana akenewe ngo umukandida yegukane umwanya wa perezida. Akanama gashinzwe amatora kavuze ko Osmane Mahamane we yabonye 17 ku ijana. Icyiciro cya kabiri cy'amatora gitegekanijwe mu kwezi kwa kabiri taliki ya 21 nyuma y'uko urukiko rurinda ubusugire bw'Itegeko Nshinga rwemeza ibyavuye mu matora ya mbere rumaze no kumva niba hari abajuririye ibyayavuyemo.
Perezida wa Nijeri Mahamadou Issoufou agiye kuva ku buyobozi nyuma yo gutegeka manda ebyiri z'imyaka itanu yikurikiranya. Bizaba bibaye ubwa mbere muri Nijeri habaye ihererekanya ry'ubutegetsi hagati y'abaperezida batowe n'abaturage hakurikijwe demokarasi.
Perezida mushya ategerejwe n'ibibazo bitari bike harimo intambara zikomeje kwiyongera ziterwa n'imitwe ya cy'isilamu nka al-Quaeda n'umutwe uharanira gushinga leta ya cy'isilamu. Ibitero byagabwe ku mupaka wo mu burasirazuba ku mupaka wa Mali na Burkina Fasso n'uwa Nijeriya mu burengerazuba bushyira amajyepfo byahitanye abantu babariwa mu bihumbi umwaka ushize.
Facebook Forum