ONU iratangaza ko abantu barenga 11,000 bahungiye ku mujyi wo ku cyambu wa Palma mu majyaruguru ya Mozambike mu ntara ya Cabo Delgado kuva inyeshyamba ziwugabyeho ibitero hashize hafi ibyumweru bibiri.
Abasivili bagera mu mujyi wa Pemba mu murwa mukuru w’intara ya Cabo Delgado barabwira abakozi batanga infashanyo ko abantu ibihumbi n’ibihumbi baheze imbere mu mujyi wa Palma no mu bice biwuzengurutse. Baranavuga ko abantu bahunga bava muri Mozambike bangiwe kwinjira mu gihugu bituranye cya Tanzaniya.
Umuvugizi w’ishami ryita ku mpunzi HCR, Babar Baloch, avuga ko bihangayikishije cyane kuba abaturage bahungisha ubuzima bwabo bakumirwa kugirango bataka ubuhungiro. Avuga ko abarenga 1,000 bagerageje kwambuka umupaka wa Mozambike ngo binjire muri Tanzaniya, bagasubizwa inyuma. Yungamo ko ubu batari bamenya uko byagenze, uwabikoze, ariko barimo kugerageza gushakisha ibisobanuro mu bategetsi bo muri Tanzaniya.
HCR irasaba ibihugu bituranyi bya Mozambike, kureka abantu bahunga urugomo bakinjira kandi bakarengerwa. Amakuru avuga ko abantu babarirwa muri mirongo bishwe n’abarwanyi ba kiyisilamu bagabye igitero i Palma kw’itariki 24 z’ukwezi gushize kwa gatatu.
Facebook Forum