Mali izakoresha amatora mu kwezi kwa kabiri kw’umwaka utaha nyuma ya leta y'inzibacyuho yakurikiye ihirikwa ry'ubutegetsi muri icyo gihugu.
Ubuyobozi bw’inzibacyuho, uyu munsi kuwa kane bwavuze ko Mali izakoresha amatora, iry’abadepite n’irya Perezida, kw’itariki ya 27 y’ukwezi kwa kabiri 2022 kugirango isubizeho guverinoma yatowe, nyuma y'ihirikwa ry'ubutegetsi ryakozwe n'abasirikare mu mwaka ushize.
Igitutu n’ibihano by’abayobozi b’ibihugu byo mu karere n’abafatanyabikorwa ku rwego mpuzamahanga, byatumye abasilikare bivumbuye bakuyeho uwari perezida, Ibrahim Boubacar Keita, mu kwezi kwa munani kw’umwaka ushize, bemera inzibacyuho y’amezi 18 iyobowe n’abasiviri.
Gahunda y’itora yatanzwe n’ubuyobozi bw’inzibacyuho kuri uyu wa kane yerekena ko itora rya Kamarampaka rizaba kw’italiki ya 31 y’ukwezi kwa cumi uyu mwaka kandi ko amatora y’abajyanama azaba kuya 26 y’ukwezi kwa 12.
Icyiciro cya kabiri cy’itora rya perezida giteganijwe kw’italiki ya 20 y’ukwezi kwa gatatu, umwaka utaha wa 2022, nihatagira umukandida ubona amajwi ari hejuru ya 50 kw’ijana mu cyiciro cya mbere.
Facebook Forum