Debretsion Gebremichael yahakanye ko yaba yarahungiye muri Sudani y'Epfo. Yemeza ko ari hafi ya Mekele, bwa mbere mu butumwa bugufi yoherereje ikigo ntaramakuru Reuters cyo mu Bwongereza, bwa kabiri mu kiganiro yagiranye kuri telefoni n’ikigo ntaramamakuru AP cyo muri Leta zunze ubumwe z'Amerika.
Muri ibi biganiro bibiri bitandukane, umuyobozi wa Tigré yatangaje ko intambara itararangira. Ati: "Twataye muri yombi abasilikali batabarika ba leta ya Etiyopiya, barimo umuderevu w'indege y'intambara yabo twarashe muri iyi wikendi, irahanuka ariko we ararokoka." Arega kandi na Eritereya baturanye ko iri muri iyi ntambara ifasha Etiyopiya. Yavuze ko ingabo ze zataye muri yombi abasilikali ba Eritereya, atavuze umubare, mu nkengero z'umujyi wa Wukro, uri nko mu bilometero 50 mu majyaruguru ya Mekele.
Kuri Debretsion Gebremichael, "iyi ntambara igamije kurengera ubwigenge n'ubusugire bwa Tigré, intara y'abaturage miliyoni esheshatu, kandi izakomeza kugera ingabo za Etiyopiya ishaka kutwigarurira zigiye."
Ku rundi ruhande, minisitiri w'intebe wa Etiyopiya, Abiy Ahmed, uyu munsi yahamagaye inama y'igitaraganya y'inteko ishinga amategeko. Mu ijambo yayibwiye, yavuze ngo "itegeko nshinga ryacu ryaratewe, ariko kurirengera ntibyadusabye imyaka itatu. Byamaze ibyumweru bitatu gusa." Ababisesengura bemeza ko yabigereranyaga n'intambara y'isubiranamo ry'abenegihugu yo muri Leta zunze ubumwe z'Amerika yabaye kuva mu 1861 kugera mu 1865.
Abiy Ahmed yahakanye ko ingabo ze zitigeze zica inzirakarengane z'abasivili, kandi ko na Mekele batazayisenya, nyuma yo kuyigarurira.
Facebook Forum