Uko wahagera

Muri Etiyopiya Abantu 200,000 Bakuwe mu Byabo n'Intambara


Umwe mu barwanyi mu ntara ya Amhara atanga amabwiriza y'uko abakuwe mu byabo bagomba guhabwa ibiribwa taliki 11 z'ukwa karindwi, 2021.

Umuyobozi ushinzwe imfashanyo mu muryango w'Abibumbye, Martin Griffiths, ejo ku wa kabiri yatangaje ko ibyo leta ya Etiyopiya ishinja abakozi batanga imfashanyo, byo gutonesha no guha intwaro ingabo za Tigreya, bishobora gukurura akaga. Yasabye ko byatangirwa ibimenyetso simusiga, bitaba ibyo, bigahagarara.

Yavuze ko ingabo za Tigreya zikomeje urugamba zigana mu majyepfo no mu burengerazuba mu karere ka Amhara, zimaze gukura mu byabo abantu bagera ku 200,000 n'abandi bagera ku 54,000 mu burasirazuba bw'igihugu.

Iyi ntambara imaze amezi umunani ishyamiranyije ingabo za leta ya Etiyopiya n'iz'ishyaka riri ku butegetsi mu karere ka Tigreya (Tigray People's Liberation Front) -TPLF.

Umuvugizi wa ministeri y'ububanyi n'amahanga wa Leta zunze ubumwe z'Amerika, Ned Price, yahamagariye ingabo za Tigreya n'iza Eritrea kuva mu turere twa Amhara na Afar kugira ngo hashobore gutangwa imfashanyo zo kuramira abaturage.

Umuryango w'Abibumbye uvuga ko abantu 400,000 bakeneye ibiribwa mu ntara ya Tigreya; abagera kuri 90 ku ijana muri bo, ku buryo bwihutirwa.

Facebook Forum

XS
SM
MD
LG