Ubutegetsi bwo muri Afuganistani bwatangaje ko kuri iki cyumweru abacamanza babiri b'abagore bakora mu Rukiko rw'Ikirenga rw'icyo gihugu barasiwe mu murwa mukuru i Kabul barapfa.
Umuvugizi w'Urukiko rw'Ikirenga yavuze ko bishwe mu gitondo cyo kuri iki cyumweru bari mu nzira bajya ku kazi ubwo umuntu utaramenyekana yamishaga urusasu ku modoka y'akazi barimo.
Polisi yo mu murwa mukuru yemeje ko undi mugore na we w'umucamanza n'umushoferi wari ubatwaye bakomerekeye muri icyo gitero. Yavuze ko barimo gukora iperereza ku byabaye.
Nta wahise yigamba icyo gitero. Umuvugizi w'umutwe w'Abatalibani yavuze ko atari bo bakigabye.
Ubutegetsi bwo muri Afuganistani buvuga ko hari abacamanza 250 n'abashinjacyaha hafi 400 bose b'igitsina gore.
Igitero cyagabwe uyu munsi ni kimwe mu bikomeje kugabwa n'abatazwi bibasiye abakozi ba leta, abanyapolitike, abashinjacyaha, abaganga, abanyamakuru, n'abandi bakozi b'inzego zinyuranye ahanini bari mu murwa mukuru Kabul.
Perezida Ashraf Ghani wa Afuganistani yamaganye igitero cyahitanye abo bacamanza ashinja umutwe w'Abataliban kukigaba. Yahamagariye abagizi ba nabi guhagarika ibyo bikorwa avuga ko iterabwoba n'imvururu bidashobora gukemura ibibazo.
Facebook Forum