Uko wahagera

Mu Bwongereza Haravugwa Ubwoko Bushya bwa Virusi ya Corona


Ibihugu binyuranye byahagaritse ingendo ziva mu Bwongereza mu rwego rwo kwirinda ubwandu

Abashakashatsi baravuga ko ubu bwoko bushya bwa virusi burusha izindi kwandura ku rugero rwa 71 ku ijana

Abashakashatsi bo mu Bwongereza baravuga ko hari ubundi bwoko bwa virusi ya corona bwandura kurusha ubusanzwe kandi bushobora gukwirakwira cyane mu bana.

Abashakashatsi bo mu ishami rishya ry'abaganga bashinzwe ubujyanama ku ndwara ziterwa na visusi z'ibyaduka zifata mu myanya y'ubuhumekero (NERVTAG), babwiye abanyamakuru muri iki cyumweru ko ubu bwoko bwa virusi burusha izindi kwandura ku rugero rwa 71 ku ijana

Ubu bwoko bushya bwa Virusi ya Corona bumaze ibyumweru mu majyepfo y' Ubwongereza. Byatumye ibihugu birenga 40 bihagarika ingendo ziva mu Bwongereza. Singapore, Filipine na Koreya y'Epfo byiyongereye kuri urwo rutonde ejo ku wa kabiri. Singapore yahagaritse abagenzi binjira mu gihugu baturutse mu Bwongereza kumara igihe kitazwi uhereye ku wa gatatu saa sita za nijoro ku isaha yo muri icyo gihugu. Yahagaritse kandi ingendo zose z'indege ziva mu Bwongereza kuva kuwa kane. Koreya y'Epfo yo yahagaritse ingendo z'indege ziva mu Bwongereza kugeza kuwa kane w'icyumweru gitaha.

Gusa Ubufaransa bwisubiyeho bukuraho icyemezo bwari bwafashe kuwa mbere cyo guhagarika ingendo zoze z'abaturuka mu Bwongereza. Ibyo byatumye abagenzi n'abatwara amakamyo ya rukururana bashobora kwinjira mu gihugu, bapfa kuba gusa bamaze amasaha 72 bipimishije bagasanga bataranduye Virusi ya Corona.

Icyo cyemezo cyari cyatumye amakamyo yikoreye ibiribwa bishobora kwangirika ahera mu mujyi wa Dover n'ahandi hambukirwa mu kigobe cy'Abongereza gihuza Ubufaransa n'Ubwongereza.

Mu yandi makuru, igihugu cya Peru cyiyongereye ku mubare w'ibyarengeje miliyoni imwe y'abanduye Virusi ya Corona. Ejo kuwa kabiri minisiteri y'ubuzima muri icyo gihugu yavuze ko abarenga miliyoni bamaze kwandura kandi ko iyo ndwara yahitanye abagera ku 37,218. Peru ni cyo gihugu cya gatanu muri Amerika y'Epfo kigeze kuri miliyoni y'abanduye Virusi ya Corona nyuma ya Bresili, Argentine, Colombiya na Mexique.

Facebook Forum

XS
SM
MD
LG