Mu Buhinde Inkongi y'Umuriro Yadutse mu Bitaro Yica Abantu 10

Mu burengerazuba bw'Ubuhinde inzego z'ibitaro biri mu mujyi wa Ahmednagar mu ntara ya Maharashtra zatangaje ko abarwayi 10 baguye mu nkongi y'umuriro yibasiye ibyo bitaro.

Ubuyobozi bw'ibyo bitaro bwabwiye Televiziyo ya New Delhi kuri uyu wa gatandatu ko icyumba cyibasiwe n'uwo muriro cyarimo abarwayi 17 ba Covid 19 barimo abo 10 bahitanywe n'ako kaga.

Nubwo bashoboye kuzimya uwo muriro, kugeza ubu icyawuteye ntikiramenyekana. Gusa ibintu nk'ibi si ubwa mbere bibaye mu Buhinde. Mu kwezi kwa gatanu ubwo iki gihugu cyibasirwaga na Covid 19 ku buryo bukabije, inkongi y'umuriro yadutse mu bitaro abarwayi ba Covid 19 bari barwariyemo yica abagera kuri 18.

Kutagenzura ibikoresho ngo bisanwe aho ari ngombwa no kutagira ibikoresho byo kuzimya umuriro bihagije bituma mu Buhinde umuriro ukomeza guhitana abantu benshi.