Perezida mushya wa Nijeri, Mohamed Bazoum, yimitswe uyu munsi mu murwa mukuru Niamey mu mutekano wakajijwe cyane.
Perezida Bazoum yarahiye iminsi ibiri nyuma y'igitero cyaburiyemo cya bamwe mu basirikari b'ingabo z'igihugu bashakaga guhirika perezida ucyuye igihe, Mahamadou Issoufou. Uwari uyoboye ako kaco, ufite ipeti rya Capitaine, yaratorotse. Kugeza n'ubu aracyashakishwa.
Umuhango kandi warimo abakuru b'ibihugu 13 byo muri Afurika y'uburengerazuba, na minisitiri w'ububanyi n'amahanga w'Ubufaransa, bukolonije Nijeri, Jean-Yves Ledrian.
Ni yo mpamvu umutekano wakajijwe cyane mu murwa mukuru wa Nijeri. Umujyi wuzuyemo kandi wagoswe n'umutwe w'abasilikali barinda umukuru w'igihugu, polisi y'igihugu, n'indi mitwe y'abasilikali b'intarumikwa.
Bibaye ubwa mbere mu mateka ya Nijeri ubutegetsi busimburana hagati y'abayobozi babiri bitorewe n'abaturage. Kuva yabona ubwigenge mu 1960, Nijeri yabayemo kudeta za gisirikari enye. Ariko Mahamane Ousmane, nawe wigeze kuba umukuru w'igihugu, wari uhanganye na Mohamed Bazoum mu matora yo mu kwezi kwa kabiri gushize, yanze kwemera ko yatsinzwe. Abadepite b'abayoboke be 50 banze kujya mu nama ya mbere y'inteko ishinga amategeko.
Perezida Mohamed Bazoum agiye ku butegetsi kandi mu bibazo by'umutekano bikomeye. Abaturage barenga 300 bamaze kwicwa kuva mu ntangiriro z'uyu mwaka mu ntambara z'imitwe y'interabwoba, Al-Qaeda, Umutwe wa Leta ya Kiyisilamu, na Boko Haram.
Facebook Forum