Ubwinshi bw’impunzi mu gihugu cya Misiri butangiye guhangayikisha ubutegetsi n’imiryango mpuzamahanga itanga imfashanyo. Abantu babarirwa mu bihumbi bakomoka muri Siriya,Yemeni, Etiyopiya, Eritreya na Libiya bahunze intambara zishingiye ku mvururu za politike bakerekeza mu Misiri.
Umuvugizi w’Ishami ry’Umuryango w’Abibumbye ryita ku mpunzi mu Misiri, Shabia Mantoo, yabwiye Ijwi ry’Amerika ko igihugu yemeza ko hari impunzi nyinshi zitanditse mu bitabo bya HCR kuko iziyandikishije ari 230,000 gusa.
Mu mwaka wa 2017, Perezida Abdel Fattah el-Sissi wa Misiri yabwiye Minisitiri w’Intebe w’Ubudage Angela Markel ko yakiye impunzi zigera kuri miliyoni eshanu ku butaka bwayo.
Mu gihe benshi bahungira mu Misiri bahabwa uburenganzira bwo kwiga, gukora no kuvurwa, icyo gihugu kiravuga ko kitabura gukumira amato yuzuye impunzi zishaka kwerekeza ku mugabane w’Uburayi.
Imiryango itanga imfashanyo iravuga ko iremerewe cyane no gukomeza gufasha impunzi muri icyo gihugu. Umwe mu bakorerabushake b’iyo miryango yabwiye Ijwi ry’Amerika ko ibiri muri yo izahagarika imirimo yakoreraga mu Misiri umwaka utaha.
Facebook Forum