Uko wahagera

Minisitiri w’Ububanyi n’Amahanga wa Nijeriya Yabonetseho COVID-19


Minisitiri w'Ububanyi n'Amahanga wa Nijeriya, Geoffrey Onyeama

Minisitiri Geoffrey Onyeama, uyu munsi ku cyumweru yavuze ko yemejweho indwara ya COVID-19 kandi ko abaye umuminisitiri wa mbere muri guverinema ya Perezida Muhammadu Buhari, wanduye virusi ya corona.

Onyeama ufite imyaka 64 yabyanditse ku rubuga rwa Twitter ko yipimishije bitewe n’uko yababaraga mu muhogo.

Yavuze ko yipimishije ku COVID-19 ejo ku ncuro ya kane, amaze kumva ababara mu muhogo; ko ku bw’amahirwe make ubu noneho yasanze yaranduye. Yavuze ko yahise ajya mu kato ahabigenewe kandi ko asaba Imana ngo bizagende neza.

Guverinema ya Buhari yakoreshaga inama y’abayobozi hifashishijwe ikorana buhanga mu buryo bwa "video conference" nka zimwe mu ngamba zo kwirinda ubwandu bwa virusi ya corona.

Leta ya Nijeriya yatangiye kworoshya ingamba za guma mu rugo mu kwezi kwa gatanu. Virusi ya corona yahitanye abantu 778 muri Nijeriya. Yanduye abarenga ibihumbi mirongo itatu na batandatu.

Onyeama, yagize uruhare mw’itahukanwa ry’Abanyanijeriya bari baraheze mu mahanga bitewe n’ingendo zahagaritse mu bihe by’icyorezo cya virusi ya corona.

Abba Kyari, wari umuyobozi mukuru mu biro bya Perezida Buhari, yitabye Imana mu kwezi kwa kane azize virusi ya corona. Niwe muntu wo mu rwego rwo hejuru mu gihugu cya Nijeriya wahitanywe n’iyo virusi.

Facebook Forum

XS
SM
MD
LG