Nk'uko ikigo ntaramakuru Reuters cyo mu Bwongereza kibivuga, Patrick Achi, yinjiye ibitaro ejobundi kuwa kabiri kubera "umunaniro mwinshi bikabije." Agomba kwisuzumisha bihagije. Nyuma azakomeza kuruhukira mu Bufaransa mbere yo gusubira mu gihugu cye.
Abanya-Côte d'Ivoire babona muri Patrick Achi umuntu ushobora gusimbura Perezida Alassane Ouattara, cyane cyane ko bombi ari n'inshuti magara. Achi yabaye minisitiri w'intebe mu kwezi kwa gatatu gushize, nyuma y'abandi babiri bari bamaze gupfa bakurikirana mu gihe cy'amezi arindwi.
Yasimbuye Hamed Bakayoko wari umaze kwitaba Imana aguye mu bitaro mu Budage. Yari afite imyaka 56 y'amavuko. Yazize kanseri. Bakayoko nawe yari yarabaye minisitiri w'intebe mu kwezi kwa kalindwi mu mwaka ushize, asimbuye Amadou Gon Coulibaly, wari umaze kwitaba Imana afite imyaka 61, azize indwara y'umutima, amaze igihe gito avuye kwivuriza mu Bufaransa.
Coulibaly na Bakayoko bapfuye abantu bo muri leta ya Côte d'Ivoire bavuga ngo nabo bari bafite umunaniro mwinshi ukabije.
Perezida Ouattara yari yagize Coulibaly kandida w'ishyaka rye ku mwanya w'umukuru w'igihugu mu matora yari hafi cyane kuba. Coulibaly amaze kwitaba Imana, Ouattara yafashe icyemezo cyo kwiyamamaza mu mwanya we, atsindira manda ya gatatu mu kwezi kwa cumi gushize.
Facebook Forum