Ikigo cy'ubushakashatsi cyo muri kaminuza ya Johns Hopkins hano muri Amerika cyatangaje kuri uyu wa Gatandatu ko abantu barenga miliyoni 75 hirya no hino ku isi bamaze kwandura Virusi ya Corona.
Leta zunze ubumwe z'Amerika niyo iri ku isonga, ibarurwamo abanduye bagera kuri Miliyoni 17.5. Ubuhinde bubarurwamo Miliyoni 10 nibwo buza ku mwanya wa kabiri naho Brazil iza ku mwanya wa Gatatu ikabarurwamo Miliyoni 7.1 z'abanduye Virusi ya Corona.
Ku butaro bya Stanford biri Palo Alto muri leta ya California, abakozi b'inzego z'ubuvuzi barimo abaganga n'abaforomo bakoze imyigaragambuyo yo kwinubira ko batashyizwe mu bagomba guhabwa urukingo rwa Covid-19 ku buryo bwihutirwa. Ibyo bitaro byasabye imbabazi bivuga ko bigiye kureba uko byakemura icyo kibazo.
Mu Bushinwa mininstri w'ubuzima wungirije Zeng Yixin yatangaje kuri uyu wa gatandatu ko mu mezi ari imbere igihugu cye kizita ku gukingira amatsinda y'abantu bashobora guhitanwa n'iyo ndwara mu buryo bworoshye mbere yuko batangira gukingira abantu mu buryo bwa rusange
Ishami ry'Umuryango w'Abibumbye ryita ku buzima (OMS) ryatangaje ko rimaze kubona inkingo za Virusi ya Corona zitandukanye zigera kuri Miliyari 2. Umuyobozi wa OMS Tedros Adhanom Ghebreyesus yavuze ko ibihugu 190 bizashobora gukingira abaturage babyo mu mezi ya mbere atandatu y'umwaka utaha.
Facebook Forum