Uko wahagera

Maleziya: Aho Gushakisha Indege Yazimiye Harongerewe


Abanyeshuri bo muri kaminuza mu Bushinwa bacanye urumuri rwo gusengera abantu bazimiye mu ndege yo muri Maleziya yaburiwe irengero
Abanyeshuri bo muri kaminuza mu Bushinwa bacanye urumuri rwo gusengera abantu bazimiye mu ndege yo muri Maleziya yaburiwe irengero
Maleziya ivuga ko yongereye uturere two gushakirizamo indege yaburiwe irengero taliki ya munani y’ukwa gatatu mu 2014.

Ministri wa transporo wa Maleziya Hishammuddin Hussein taliki ya 14 y’ukwa gatatu mu 2014 yavuze ko impamvu zidasobanuwe zatumye bemeza ko bashakiriza iyo ndege mu Nyanja y’Abahindi. Aho ni ku bilometero birenga mu bihumbi bitanu uvuye ahantu iyo ndege yacikiye ijisho ry’icyuma cya radari ya gisivili yayikurikiranaga.

Indege za gisilikari z’Ubuhindi zagurutse hejuru y’akarere k’ibirwa bya Andaman na Nicobar, zishakisha iyo ndege. Ako karere kagizwe n’uturwa turenga 500, tudatuwe na gato, kandi twuzuyemo amashyamba.

Ibikorwa bya gushakisha iyo ndege byahuruje ibihugu byinshi by’amahanga, bikoresha ubuhanga buhanitse. Hafi amato 60 n’indege zirenga 50 bikomoka mu bihugu 13 byo kw’isi. Igice bashakishirizamo kirarenga kilometero-kare ibihumbi 90. Ni ukuvuga ahantu haruta ubuso bw' u Rwanda inshuro enye.

Ariko nta n’ubu nta kanunu na gato, iminsi itandatu nyuma y’uko indege izimira. Yari itwaye abantu 239, abagenzi 227, n’abaderevu n’abakozi bo mu ndege 12. Abenshi mu bagenzi bari Abashinwa.
XS
SM
MD
LG