Uko wahagera

Loni Yamaganye Imirwano Ibera muri Libya


Abarwanyi b'umutwe wa Misrata ushyigikiye ubutegetsi bwa Libya bitegura kujya ku rugamba

Umukozi mukuru w'Umuryango w'Abibumbye muri Libiya, Ghassan Salame, yamaganye imirwano ibera mu murwa mukuru Tripoli. Avuga ko yarushijeho gukaza umurego kuva ingabo za jenerali Khalifa Haftar, zitangiye imirwano igamije gufata uwo mujyi mu ntangiriro z’uku kwezi.

Umuvugizi w'Umuryango w'Abibumbye, Stephane Dujarric, yabwiye abanyamakuru i New York, ko abasivili barenga batanu bivugwa ko bishwe, kandi ko abandi benshi bakomeretse.

Dujarric yagize ati:”Intumwa z'Umuryango w'Abibumbye muri Libiya zamaganye ikoreshwa ry’ibitwaro bikomeye no kurasa bitarobanura, byashenye amazu y’abasivili, amashuri n’ibikorwa remezo.

Intumwa yihariye y’umunyamabanga mukuru w'Umuryango w'Abibumbye , Ghassan Salame, akomeje gusaba agahenge k’ubutabazi, kugira ngo serivise zihutirwa zibashe kugera ku basivili bagotewe n’imirwano turere twabo”.

Muri iki cyumweru, Inteko ishinzwe umutekano kw’isi y'Umuryango w'Abibumbye, yatekereje ku mwanzuro uhamagarira kugabanya ubushyamirane no gutanga agahenge.

Libiya iri mu kaduruvayo ka politiki no mu bibazo by’ubukungu kuva Moammar Gadhafi akuwe ku butegetsi akanicwa mu 2011.

Facebook Forum

XS
SM
MD
LG