Leta zunze ubumwe z'Amerika yafatiye ibihano Etiyopiya n'abantu bafite uruhare mu ntambara yo muri Tigreya. Mu itangazo yashyize ahagaragara, minisitiri w'ububanyi n'amahanga wa Leta zunze ubumwe z'Amerika, Antony Blinken, atangaza ko ibi bihano bitewe n'uko "abo bireba bose batigeze bafata ingamba zo kurangiza intambara. Bigamije rero kubashyiraho igitutu kugirango bagane inzira y'amahoro ku buryo burambye."
Ibi bihano bireba abantu bari cyangwa bahoze muri guverinoma za Etiyopiya na Eritreya. Ibi bihugu byombi byamaze igihe kirekire bihakana ko abasilikali ba Eritreya barwana muri Tigreya bafatanyije n'ingabo za Etiyopiya, mbere yo kubyemera
Ibihano biri mu rwego rw'ubukungu n'umutekano. Birimo no kwima viza abategetsi b'ibihugu byombi, n'abategetsi b'intara y'Amhara, imwe mu zifite ubwigenge bucagase zigize Etiyopiya, mu majyaruguru y'igihugu, n'aba TPLF (Front de Libération du Peuple du Tigré), umutwe wa politiki na gisilikali wari ku butegetsi muri Tigreya. Abo mu miryango y'aba bategetsi bose nabo ibihano bishobora kubageraho.
Leta zunze ubumwe z'Amerika ishobora gushyiraho n'ibindi bihano bibaye ngombwa. Izakomeza kandi n'ibindi yashyizeho mbere. Ariko ntikuyeho imfashanyo zo kugoboka abari mu kaga, n'izindi zifitiye akamaro Abanyetiyopiya, nko mu nzego z'uburezi, ubuzima, guteza imbere abari n'abategarugori, demokarasi n'uburenganzira bwa muntu.
Facebook Forum