ONU ivuga ko ubucucukirane bw’impfungwa n’isuku nke birimo gutuma COVID-19 ikwirakwira vuba vuba mu magereza muri Amerika ya Ruguru n’iy’Epfo.
Abategetsi muri ONU ntibavuze imibare nyayo, ariko bavuze ko ibihumbi by’impfungwa muri ako karere bagaragayeho virusi ya corona. Bafite ubwoba bwo kwanduzanya hagati y’abagororwa no kutagira ubuvuzi bukwiye ku barwayi, byatumye haba impagarara mu magereza.
Umukwabu uheruka ni uwo kw’italiki ya mbere y’uku kwezi kwa gatanu, aho bivugwa ko impfungwa 47 zasize ubuzima mu mvururu zabayemo urugomo muri gereza ya Llanos muri Venezuela. Abagororwa kandi barishwe abandi barakomereka mu myigaragambyo iheruka mu gihugu cya Peru na Colombia.
Umuvugizi w’ishami rya ONU ryita ku burenganzira bwa muntu Rupert Colville avuga ko impfungwa nyinshi zagerageje gutoroka gereza kubera imibereho idashwitse muri gereza zo muri Argentine, Brezile na Colombia, Mexico na Leta zunze ubumwe z’Amerika.
ONU irasaba amaperereza ku cyateje impfu no gukomereka mu mikwabu yabaye mu magereza. Irasaba za leta gufata ingamba ziboneye zo kubuza virusi ya corona gukomeza gukwirakwira, isuku ikaboneka, hakaba gupima ku buryo busesuye kandi abagororwa bakitabwaho mu by’ubuvuzi.
Colville avuga ko umubare munini w’abarwayi ba COVID-19 muri gereza za Leta zunze ubumwe z’Amerika, uteye impungenge, bitewe n’ubwinshi bw’abantu bafunze. Bagera muri miliyoni 2 n’ibihumbi 300. Avuga ko ikindi kirushijeho guhangayikisha ari umubare munini w’abantu bari mu bigo bifungirwamo abimukira bashaka ubunguriro.
Avuga ko imibereho y’abantu muri ibyo bigo no mu magereza byagombye gukurikiranirwa hafi n’abantu badafite aho babogamiye. Akongeraho ko impfungwa zirwaye COVID-19 zagombye gushyirwa mu kato atari ku buryo bw’ibihano cyangwa bagashakirwa mu mazu bashobora kuvurirwamo.
Facebook Forum