Uko wahagera

Kenya Yatangije Urukingo rwa Kanseri y'Inkondo y'Umura


Ubutegetsi bwo muri Kenya bwatangiye igikorwa rusange cyo gukingira abakobwa virusi itera Kanseri y’inkondo y’umura. Ishami ry’Umuryango w’Abibumbye ryita ku buzima rivuga ko Africa y’Uburasirazuba ariyo ifite umubare munini ku isi w’abantu bafatwa na kanseri y’inkondo y’umura.

Nubwo Kenya iza ku isonga mu karere mu guteza imbere ubuvuzi, abategetsi b’icyo gihugu bemera ko bagize umuvuduko muke mu gukingira abakobwa n’abagore virusi itera kanseri y’inkondo y’umura.

Ku rwego rw’igihugu urwo rukingo rwatangirijwe mu mugi wa Mombasa, ruzatangirwa ubuntu ku bakobwa bujuje imyaka 10. Ruzashyirwa mu mibare isanzwe y’inkingo zihabwa abana, rutangwe kabiri mu gihe cy’amezi atandatu.

Perezida wa Kenya Uhuru Kenyatta yavuze ko urwo rukingo ari intambwe ikomeye itewe mu kurwanya indwara zitandura. Minisiteri y’Ubuzima muri Kenya ivuga ko uyu mwaka uru rukingo ruzatwara igihugu amadolari y’Abanyamerika agera kuri miliyari 7.7. Biteganijwe ko ruzagabanya uburwayi bwa kanseri y’inkondo y’umura muri Kenya ku rugero rwa 70% cyangwa 80% mu gihe byaba bigenze neza.

Uru rukingo rutangwa mu bindi bihugu 115 birimo Uganda u Rwanda na Tanzaniya. Dr. Collins Tabu kuriye gahunda yo gukingira muri Kenya avuga ko mu bihugu nk’ u Rwanda ikibazo cya kanseri y’inkondo y’umura kiri hafi gucika burundu ariko ko igihugu cye cyagenje make kubera impaka ku ngaruka z’inkingo. Hashize imyaka Kiliziya Gatulika yo muri Kenya ihamagariye abayoboke bayo kwanga inkingo z’indwara ya Polio.

Facebook Forum

XS
SM
MD
LG