Uko wahagera

Kazakisitani: Perezida Kassym Tokayev Yatanze Uruhushya rwo Kurasa Abigaragambya


Ingabo z'Uburusiya zije gufasha Kazakistani guhosha imyigaragambyo

Imyigaragambyo yatangiye igenda nka serwakira mu cyumweru gishize muri Kazakisitani, igihugu kiri muri Aziya yo hagati, mu byahoze bigize Repubulika zunze ubumwe z'Abasoviyete (URSS mu magambo magufi y'Igifaransa).

Yatewe n'uko leta yakubye kabiri ibiciro bya lisansi (essence). Ariko abasesengura ibya politiki bemeza ko ari ikimenyetso ko abaturage barambiwe ubutegetsi bw'igitugu barimo kuva Kazakisitani isohotse muri URSS, ibona ubwigenge mu 1991.

Imyigaragambyo yafashe intera ndende cyane ku buryo butunguranye. Abaturage ibihumbi, bamwe bafite amahiri, batwitse inyubakwa za leta. Inzego z'umutekano byarazirenze, bituma Perezida Kassym Tokayev yitabaza mugenzi we w'Uburusiya, Vladimir Putin. Abasikare b'Uburusiya, biswe "ingabo zo kubungabunga amahoro", batangiye kugera muri Kazakisitani ejo kuwa kane.

Uyu munsi, Perezida Tokayev yavugiye kuri televiziyo ya leta ko yahaye inzego z'umutekano uburenganzira bwo kurasa byo kwica nta kuzuyaza.

Kuri we, abari mu myigaragambyo ni "abagome, abaterabwoba, abicanyi."

Naho minisiteri y'ubutegetsi bw'igihugu ya Kazakisitani yatangaje none ko "abicanyi 26" bamaze kwicwa, n'abandi barenga 3,000 batawe muri zombi. Yongeraho ko abapolisi 18 nabo biciwe muri iyi myigaragambyo kugeza ubu.

Leta zunze ubumwe z'Amerika yatangaje ko ihangayikishijwe n'uko abasilikare b'Uburusiya bashobora kwigarurira Kazakisitani. Umuvugizi wa minisiteri y'ububanyi n'amahanga y'Amerika, Ned Price, yabwiye itangazamakuru ko "babikurikiranira hafi."

(VOA ifatanyije n'ibigo ntaramakuru AP, AFP, na Reuters)

Facebook Forum

XS
SM
MD
LG