Uko wahagera

Kameruni: Indaya Zikomeje Kurenga ku Ngamba zo Gukumira COVID19


Agasho gakuru k'i Yaounde
Agasho gakuru k'i Yaounde

Polise ya Kameruni yatangiye guta muri yombi abantu barenga ku mabwiriza yashyiriweho guhagarika ikwirakwira rya virusi ya Corona, kugeza ubu imaze kwandurwa n’abantu bakabakaba 140.

Polise irafunga amaduka isanzemo abantu benshi. Irahagarika imodoka zitwaye abagenzi bakabije. Imaze no guhagarika indaya zirenga 50 zinjiye mu mahoteli rwihishwa. Ni amahoteli yagenewe abakekwaho kuba baranduye virusi ya Corona bashyizwe mu kato.

Jean Claude Tsila, umuyobozi mukuru muri guverinema muri divisiyo ya Mfoundi, iherereyemo umujyi w’ubuyobozi, Yaounde avuga ko yumiwe amaze kumenya ko abantu bashyizwe mu kato mu mahoteli bakekwaho kuba baranduye COVID-19, bakira abakiriya mw’ijoro.

Yategetse ko indaya 50 zitabwa muri yombi, kimwe n’abagore 13 n’abagabo 6 bagiye rwihishwa mw’ihoteli kujya guhura n’abo bashakanye.

Tsila yategetse ko abantu bose bafashwe, bashyirwa mu kato mu gihe polise yahawe amabwiriza yo gushaka abantu bagiye mw’ihoteli batabifitiye uruhushya, ubu barimo kwihishahisha.

Abayobozi ba Kamerni bari baherutse gushyira mu kato abaturage bayo barenga 500 n’abanyamahanga 70, hagamijwe guhagarika ikwirakwira rya virusi ya Corona.

Abo bose bari bashyizwe mu kato batorokeye mu gihugu cya Centrafurika kw’italiki ya 17 n’iya 18 y’uku kwezi kwa gatatu, mbere y’uko guverinema ifunga imipaka, ikanahagarika gutanga visa kuzageza igihe hazagira ikindi itangaza.

N’ubwo abantu 150 batorotse ihoteli bari bashyizwemo mu kato, guverinema iracyabashakisha kimwe n’abandi 186 bari bagarutse mu gihugu bavuye mu Bufaransa no mu Butaliyani kw’italiki 17 y’ukwezi kwa gatatu bakanga kwishyira mu kato.

Abayobozi baravuga ko abaturage ba Kameruni bafata virusi ya Corona bajenjetse n’ubwo guverinema ihora ibaburira. Abategetsi barimo gutera intambwe zo gutuma abantu bubahiriza amabwiriza yo kutegerana.

Facebook Forum

XS
SM
MD
LG