Uko wahagera

Kameruni: Emmanuel Ngafeson Bantar Wafashwe Bunyago Yarekuwe


Emmanuel Ngafeson Bantar wahoze ari umunyamabanga ari iwe i Bamenda mukwa gatatu 31, 2019.

Abaharanira ubwigenge bw’intara y’amajyaruguru ashyira uburengerazuba bwa Kameruni bakoze igikorwa kidasanzwe barekura umukozi mukuru wahoze akora muri minisiteri y’ubutabera batamuriye n’urwara nyuma y’ibyumweru bibiri bamufashe bugwate.

Emmanuel Ngafeson Bantar niwe wabaye umujyanama wa mbere wa Perezida Paul Biya wari ufatiwe bugwate mu majyaruguru ashyira uburengerazuba bwa Kameruni.

Bantar yavuze ko igihe amaranye n’abaharanira ubwigenge bw’intara y’amajyaruguru ashyira uburengerazuba cyamweretse ko intambara imaze imyaka itatu muri icyo gihugu ishobora kurangira leta iramutse yinjiye mu ibiganiro bihamye na bo.

Bantar, wahoze ari umunyamabanga wa leta ushinzwe ubuyobozi bw'amagereza muri minisiteri y’ubutabera, yafashwe bunyago n’abantu bitwaje intwaro mu kwezi kwa gatatu. Mu gihe abandi bakozi ba leta bafashwe n’abaharanira kwigenga kw’iriya ntara birangira bishwe, Bantar we avuga ko bamufashe neza.

Leta ya Kameruni ivuga ko abakozi ba leta bagera kuri 15 n’abatware gakondo b’amoko bagera kuri batanu bamaze gufatwa bunyago n’abo barwanyi mu myaka ibiri ishize. Icyenda muri bo bagaragaye bapfuye. Abandi umunani ntawe uzi aho baherereye. Abandi barekuwe aruko habanje gutangwa impongano ziremereye.

Frankline Ndi, uharanira uburenganzira bwa muntu aravuga ko irekurwa rya Bantar rishobora kugaragaza ko abaharanira ukwigenga kwiriya ntara baba barambiwe intambara imaze guhitana abantu bagera ku gihumbi muri Kameruni.

Facebook Forum

XS
SM
MD
LG