Uko wahagera

Jenerali Salvador Zepeda Yafatiwe Muri Amerika


Generasl Salvador

Uwahoze ari minisitiri w'ingabo z'igihugu cya Mexique, Jenerali Salvador Zepeda, yatawe muri yombi muri Leta zunze ubumwe z'Amerika. Akekwaho ibyaha byo gucuruza ibiyobyabwenge n'iyezandonke y'imali ibikomokamo

Jenerali Salvador Zepeda, w'imyaka 72 y'amavuko, yabaye minisitiri ukomeye w'ingabo za Mexique imyaka intandatu ku butegetsi bwa Perezida Enrique Pena Nieto, kuva mu 2012 kugera mu 2018.

Yafatiwe ku kibuga cy'indege mpuzamahanga cya Los Angeles, muri California, mu burengerazuba bwa Leta zunze ubumwe z'Amerika, ku mpapuro zo kumuta muri yombi z'ikigo cy'igihugu kirwanya ibiyobyabwenge DEA.

Imiryango iharanira uburenganzira bwa muntu yemeza ko igihe Jenerali Salvador Zepeda yari minisitiri w'ingabo za Mexique, abasilikali be bakoze ubwicanyi ku nzirakarengane, burimo ubwo mu 2014 ahitwa Tlatlaya, mu majyepfo ya Mexique, bwaguyemo abantu 22.

Abantu benshi bari muri guverinoma ya Perezida Enrique Pena Nieto n'abandi bakomeye bo mu ishyaka rye bakekwaho n'ubutabera ibyaha bya ruswa byo mu rwego rwo hejuru. Bamwe na bamwe baba bakorana ndetse n'imitwe y'abicanyi, nk'icuruza ibiyobyabwenge ikomeye.

Uretse Jenerali Salvador Zepeda, undi mugabo witwa Genaro García Luna, w'imyaka 52 y'amavuko, wabaye minisitiri w'umutekano wa Mexique kuva mu 2006 kugera mu 2012, afungiye i New York mu burasirazuba bwa Leta zunze ubumwe z'Amerika kuva mu 2019.

Umushinjacyaha amukurikiranyeho ibyaha byo gufatanya n'umutwe ukomeye ucuruza ibiyobyabwenge wa Sinaloa wa “El Chapo” Guzmán, nawe uri muri gereza muri Leta zunze ubumwe z'Amerika.

Facebook Forum

XS
SM
MD
LG