Muri Israeli, abaturage biriwe mu matora y'inteko ishinga amategeko, ari yo avamwo na minisitiri w'intebe, ku nshuro ya kane mu myaka ibiri. Aya matora y'uyu munsi asa nk'aho ari referendumu ku mikorere ya Benjamin Netanyahu.
Netanyahu, w'imyaka 71 y'amavuko, ni we minisitiri w'intebe utegetse Isirayeli igihe kirekire kurusha abandi bose bamubanjirije. Amaze imyaka hafi 15 ku ntebe. Abatavuga rumwe nawe bavuga ko akwiye kuyivaho kubera ko, kuri bo, yitwaye nabi mu bibazo by'icyorezo cya Covid. Bemeza ko yananiwe gutegeka abaturage kuguma mu rugo, bituma virusi ikwirakwira cyane.
Bavuga kandi ko adakwiye gutorwa no gutegeka kubera urubanza arimo aburana ku byaha bya ruswa no gukoreshya umwanya we mu nyungu ze bwite. We arabihakana, kandi yanze kwegura. Asobanura ko yibasiwe n'abashaka kumuta mu rwobo gusa, ari bo abapolisi, abashinjacyaha, ibitangazamakuru, n'abaturage bahora mu myigaragambyo muri aya mezi icyenda ashize imbere y'aho atuye.
Netanyahu ahanganye muri aya matora n'abantu byibura 14. Uza ku isonga muri bo ni Yair Lapid, wahoze ari umunyamakuru w'icyamamare wa televiziyo ya Isirayeli na minisitiri w'imali. Akuriye ishyaka ryitwa Yesh Atid, bishatse nko kuvuga ngo "Ejo hazaza ni heza." Ibipimo byabanjirije aya matora bimuha amahirwe yo kuza ari uwa kabiri inyuma ya Netanyahu.
Ikirambiye abaturage ba Isirayeli ariko ni uguhora mu matora. Umukuru w'igihugu cyabo, Perezida Reuven Rivlin, amaze gutora yabisobanuye avuga ko "amatora ya kane mu myaka ibiri yatumye rubanda batakariza icyizera demokarasi." Ariko yabashishikarije kongera gutora, ati: "Nta yindi nzira."
Guhora mu matora biterwa n'uko nta shyaka rikibasha gutsinda ku buryo bwiganje, bwa mbere mu myaka 72 Israeli imaze.
Facebook Forum