Irani Yatangiye Kuyungurura Ubutare bwa "Uranium" ku Rwego rwa 20%

Irani iratangaza ko yatangiye kuyungurura ubutare bwa "uranium" ku rwego rwa 20%. Umuvugizi wa guverinoma ya Irani, Ali Rabiei, yabitangaje uyu munsi ko iki gikorwa cyantagiye none mu ruganda ruherereye mu misozi y'ahitwa Fordo, muri kilometero 40 mu majyepfo y'umujyi wa Qom. Aha na ho ni muri kilometero 140 mu majepfo y'umurwa mukuru w'igihugu, Teherani. Mu cyumweru gishize ni bwo Irani yari yamenyesheje uyu mugambi wayo AIEA, ishami ry'Umuryango w'Abibumbye rishinzwe ibya "nucleaire."

Iki gikorwa ni indi ntambwe ya Irani yo gusohoka mu masezerano yo mu 2015, yagiranye n'ibihugu bitandatu by'ibihangange, Leta zunze ubumwe z'Amerika, Ubwongereza, Ubufaransa, Ubudage, Uburusiya n'Ubushinwa. Muri aya masezerano, Irani yari yemeye guhagarika kuyungurura uranium, naho amahanga ayemerera gukuraho ibihano yari yarayifatiye. Leta zunze ubumwe z'Amerika yavuye muri aya masezerano mu 2018, ariko Joe Biden watorewe kuzayobora igihugu yatangaje ko Amerika ishobora kuzayasubiramo namara gufata ubutegetsi.

Aya masezerano yashyizweho umukono igihe Irani yari igeze ku rwego rwo kuyungurura uranium kugera kuri 4,5%, kure cyane ya 90% ikenewe kugirango ibashe gukora intwaro kirimbuzi "bombe atomique."