Perezida wa Irani, Hassan Rouhani, ari mu rugendo mu Bufaransa. Muri uru ruzinduko, ibihugu byombi bigomba gushyira umukono ku masezerano y’ubuhahirane nyuma y’aho Irani ikuriweho ibihano yari yarafatiwe.
Muri ayo masezerano, Irani irateganya kugura indege nini 114 zitwara abantu zo mu bwoko bwa Airbus, zikorerwa mu Bufaransa. Ibigo bikora imodoka Peugeot na Citroen nabyo biteganijwe ko bikomorerwa, bigasubira gukorera muri Irani. Peugeot yonyine ubwayo irateganya gutangira gukorera muri Irani imodoka zirenga ibihumbi 200 buri mwaka guhera mu 2017.
Rouhani ni we perezida wa Irani wa mbere usuye Ubufaransa kuva mu 1999. Uruzinduko rwe mu Bufaransa ruri mu rwego rw’urugendo rw’iminsi itanu mu Bulayi, aho yasuye Ubutaliyani, na Papa Fransisko i Vatican.