Uko wahagera

Irani na Amerika Bikomeje Guhangana


Donald Trump na Hassan Rouhani

Abategetsi ba Irani bateye utwatsi ibihano bishya bya Leta zunze ubumwe z’Amerika n’ibiganiro Amerika ishaka. Perezida Hassan Rouhani yavuze ko bitumvikana ukuntu wafatira ibyemezo umuntu ugahindukira ugashaka ko mugirana imishyikirano.

Naho umuvugizi wa minisitiri w’ububanyi n’amahanga wa Irani yanditse ku rubuga rwa Twitter ko ibihano bishya bifunze burundu amayira yose ya diplomasi hagati ya Irani na Leta zunze ubumwe z’Amerika.

Ikigo ntaramakuru Fars cya leta ya Irani kivuga ko guhera ku italiki ya 7 y’ukwezi gutaha (kwa kalindwi) Irani izitandukanya burundu n’izindi ngingo ebyili zo mu masezerano ya Nikleyeri yo mu 2015. Muri urwo rwego, leta ya Irani ivuga ko izasubukura umushinga wo kubaka uruganda rwa “Nikleyeri” rw’ahitwa Arak, rwa gati mu gihugu, rwari rwarahagaritswe n’aya masezerano.

Ku italiki ya 8 y’ukwa gatanu gushize, Irani yari yavuze ko iretse burundu ingingo ebyili z’amasezerano zombi ziyitegeka urugero ntarengwa bw’ibikoresho byinjira mu iyungurura rya “uranium.” Ubu bwa mbere, Irani yari yabisobanuye ivuga ko ari uburyo bwo kwishyura Leta zunze ubumwe z’Amerika nayo yari imaze gutangaza ko isohotse mu masezerano yo mu 2015 yose uko yakabaye n’ibihano yari imaze kuyifatira.

Kuri perezida wa Leta zunze ubumwe z’Amerika, Donald Trump, icyemezo cya Irani cy’uyu munsi ni “igitutsi.” Ku rubuga rwe rwa Twitter, Perezida Trump yongeyeho ko “Irani iramutse igabye igitero ku kintu icyo ari cyo cyose cy’Amerika, kuyivuna ni ukuyishwanyuza.” Ubufaransa bwatangaje ko icyemezo cya Irani kigiye mu bikorwa “cyaba ari ikosa rikomeye cyane.” Ubufaransa, Ubudage, Ubwongereza, n’Ubushinwa, bose bari mu masezerano yo mu 2015, basaba impande zombi “kugarura umwuka mwiza.”

Facebook Forum

XS
SM
MD
LG