Mu itangazo yashyize ahagaragara, minisitiri w'ububanyi n'amahanga wa Leta zunze ubumwe z'Amerika, Mike Pompeo, arasaba ko "abatabazi bafungurirwa amayira, n'uko itumanaho ryongera gukora vuba muri Tigré."
Imiryango y'ubutabazi ifite impungenge ko iyi ntambara yaba imaze guhitana abantu ibihumbi. Abaturage barenga ibihumbi 30 bahungiye muri Sudani kandi bariyongera buri munsi. Naho imbere muri Tigré ubwaho, nk'uko guverinoma y'iyi ntara ibyemeza, abaturage barenga ibihumbi ijana bavuye mu byabo.
Ibigo ntaramakuru bitandukanye bivuga ko bigenda bibona amakuru yemeza ko abakomoka muri Tigré bibasiwe muri Etiyopiya kubera ubwoko bwabo. Ariko guverinoma ya Etiyopiya yo irabihakana yivuye inyuma.
Nyamara kandi, amwe muri aya makuru yemeza ko abasilikali ba Etiyopiya bari mu butumwa bw'amahoro muri Somaliya bagera kuri 300 bo mu bwoko bwa Tigré bambuwe imbunda na bagenzi babo, ku itegeko rya leta yabo, kubera ko ikeka ko bashobora kuba ibyitso. Ikigo ntaramakuru Reuters cyo mu Bwongereza kibyandika kivuga ko cyakuye aya makuru mu badipolomate n'inzego z'umutekano muri Somaliya, ariko ko leta ya Ethiopia na Amisom (ingabo z'Afurika muri Somaliya) banze kugira icyo babivugaho.
Etiyopiya ifite imitwe y'ingabo ibiri itandukanye muri Somaliya. Umwe, ugizwe n'abasilikali ibihumbi bine, uri muri Amisom. Undi w'abasilkali ibihumbi 15 uri muri Somaliya mu rwego rw'amasezerano yihariye hagati y'ibihugu byombi.
Ku birebana n'imirwano, ingabo za Etiyopiya zaba zatangiye ibikorwa byo kujya gutera umujyi wa Mekele, umurwa mukuru wa Tigré. Abayobozi b'iyi ntara basohoye itangazo bavuga ko batazashyira intwaro hasi, ahubwo ko intambara igiye gukomera.
Facebook Forum