Mu irushanwa ry'amakipe y'ibihugu y'abagore yo mu karere ka gatanu k'imikino muri Afurika ryatangiye ku wa mbere w'iki cyumweru muri Kigali Arena i Remera, nyuma yo gutangira neza itsinda ikipe yigihugu ya Kenya, ikipe y'u Rwanda ntabwo yashoboye kurusyaho ku mukino wayo wa kabiri wayihuje na Misiri kuri uyu wa kabiri.
Abakobwa b'umutoza Cheikh Sarr w'Umunyasenegali bananiwe gutsinda Misiri. Mu mukino watangiye i saa kumi n'ebyiri z'umugoroba, u Rwanda rwari rwatangiye neza kuko rwari ruri imbere mu manota mu duce tubiri twa mbere tw'umukino. Agace ka gatatu karangiye amakipe yombi anganya amanota 49 kuri 49 ariko mu gace ka kane Abanyamisiri babadukana impambara, umukino urangira batsinze Abanyarwandakazi amanota 71 kuri 59.
Kapiteni wikipe yigihugu yu Rwanda Tierra Henderson usanzwe akinira Phoenix Constanta yo muri Rumaniya nta ko atari yagize we na bagenzi be, ariko bakubita ibipfukamiro hasi imbere ya Misiri ifite abakinnyi b'intyoza nka Amer Hagal, Soraya Digheidy, Meral Abdelgawad n'abandi.
Mu wundi mukino wari wabaye ku wa kabiri watangiye i saa cyenda zigicamunsi ikipe y'igihugu ya Kenya yatsinze Sudani y'Epfo amanota 66 kuri 48. Nyuma yo gutsindwa umukino wayo wa kabiri, Sudani y'Epfo y'umutoza w'Umunyamerikakazi Lindsay Harding itangiye kugaragara nk'aho ari yo nsina ngufi muri aya makipe ane arimo guhatana muri iri rushanwa rya zone cinq.
Kuri uyu wa gatatu na bwo hateganyijwe imikino ibiri. Guhera i saa cyenda Kenya irahura na Misiri hanyuma i saa kumi n'ebyiri ikipe yu Rwanda ikine na Sudani y'Epfo. Nyuma y'iyo mikino harahita hamenyekana uko amakipe akurikirana mbere yo guhatana muri kimwe cya kabiri cy'irangiza ku wa gatanu. Icyo gihe ikipe ya mbere izahura n'iya kane hanyuma ikipe ya kabiri ikazahura n'iya gatatu.
Facebook Forum