Uko wahagera

Ingwara Idasobanutse ku Wageragerezwako Urukingo rwa COVID19


Ikigo gikomeye mu bushakashatsi n'ubucuruzi bw'imiti cyo muri Leta zunze ubumwe z'Amerika cyitwa Johnson & Johnson cyahagaritse igerageza ry'urukingo rwa Covid-19. Umwe mu bakandida rwageragezwagaho ku bushake bwabo yarwaye indwara itarasobanuka.

Sosiyete Johnson & Johnson yatangiye mu kwezi kwa cyenda gushize igerageza rw'urukingo rwo ku rwego rwa gatatu ku bantu babyishakiye ibihumbi 60 muri Leta zunze ubumwe z'Amerika ubwaho no mu mahanga nko mu bihugu by'Argentine, Bresil, Chili, Colombia, Mexique, na Perou byo ku mugabane w'Amerika y'Epfo, n'Afurika y'Epfo. Igerageza ryo ku rwego rwa gatatu rivuze ko urukingo ruba ruri hafi kwemezwa ko rukora koko, cyangwa se ko rudakora.

Mu itangazo yashyize ahagaragara, Johnson & Johnson isobanura ko umwe muri bo yafashwe n'indwara batazi iyo ari yo, bityo ko barimo bareba impamvu yayiteye, by'umwihariko niba ifitanye isano n'urukingo.

Johnson & Johnson yemeza ko "indwara, impanuka, n'izindi ngaruka zitunguranye, bibaho kenshi mu igeregeza ry'inkingo, cyane cyane iyo rikorerwa ku bantu benshi." Akenshi ntibijya bivugwa. Gusa icyo gihe igerageza rirahagarara, abaganga n'inzego zishinzwe umutekano w'abarwayi bakabanza kureba ikibitera.

Ku birebana n'urukingo rwa Covid-19 rwo ni ibindi bindi kubera icyizere abantu amamiliyoni bafite ko ruzaboneka vuba. Johnson & Johnson ni kimwe mu bigo icumi ku isi, na kimwe muri bine muri Leta

zunze ubumwe z'Amerika, biri mu isiganwa ry'igerageza ryo ku rwego rwa gatatu ry'urukingo rwa virusi ya Corona. Guverinoma y'Amerika yayihaye amadolari miliyari hafi imwe n'igice kugirango ikore ubushakashatsi bw'uru rukingo.

Johnson & Johnson ibaye iya kabiri ihagaritse igerageza ry'urukingo rwa Covid-19 kubera indwara idasobanutse, nyuma y'ikindi kigo cy'ubushakashatsi n'ubucuruzi bw'imiti cy'Abongereza n'Abanyasuwede cyitwa AstraZeneca gifatanyije na kaminuza Oxford yo mu Bwongereza. Nabo byababayeho kimwe na Johnson & Johnson mu kwezi kwa cyenda gushize.

Facebook Forum

XS
SM
MD
LG