Mu itangazo yashyize ahagaragara, UNAMID ivuga ko guhera uyu munsi yatangiye gushyira ibirindiro byayo mu maboko y'ingabo za Sudani. Mu cyumweru gishize, Inteko y'Umuryango w'Abibumbye ishinzwe umutekano ku isi ni bwo yafashe icyemezo cyo gufunga UNAMID ku italiki ya 31 y'ukwa 12, 2020.
Gutahura abakozi bayo bose bizarangira mu gihe cy'amezi atandatu. Muri iki gihe, UNAMID igizwe n'abasilikali, abapolisi n'abasivili bagera ku bihumbi umunani. U Rwanda ni rwo rufitemo benshi kurusha ibindi bihugu. Bose hamwe bararenga ibihumbi bitatu.
UNAMID yari imaze imyaka 13 muri Darfur kubera intambara hagati y'inyeshyamba zari zarigometse kuri leta n'intambara z'amoko zatangiye mu 2003. Umuryango w'Abibumbye uvuga ko izi ntambara zahitanye abantu bagera ku bihumbi 300, zirukana mu byabo abandi barenga miliyoni ebyiri n'igice. Benshi baracyari mu nkambi z'impunzi.
Izi ntambara kandi zavuyemo jenoside, ibyaha by'intambara n'ibyaha byibasiye inyokomuntu. Uwahoze ari umukuru w'igihugu cya Sudani, Omar el-Beshir, ni umwe mu bashakishwa n'urukiko mpanabyabaha mpuzamahanga kubera ibi byaha ashinjwa.
Facebook Forum