Uko wahagera

Ingabo Za Etiyopiya Zigaruriye Umurwa Mukuru wa Tigré


Minisitiri w'intebe wa Etiyopiya, Abiy Ahmed, n' intumwa z'Umuryango w'Afrika yunze ubumwe, ziyobowe n'abahoze ari abakuru b'ibihugu bya Liberia, Mozambike na Afurika y'epfo.

Ministiri w’intebe wa Etiyopiya Abiy Ahmed yatangaje ko ingabo z’igihugu zigaruriye umurwa mukuru w’intara ya Tigré, Mekelle.

Mu itangazo yasohoye ku rubuga rwe twitter, yavuze uko umujyi wa Mekelle wose ubu ugenzurwa n’ingabo za leta. Ayo makuru yanashyimangiwe n’umugaba mukuru w’ingabo za Etiyopiya Jenerali Berhanu Jula.

Bibaye amasaha make ingabo za Etiyopiya zigabye ibitero ku mujyi wa Mekelle.

Ni ibitero byemejwe mbere n’abadiplomate bavuganye n’abatuye iyo ntara na bamwe mu barwanyi bo mu bwoko bw’aba Tigrayan.

Debretsion Gebremichael, uyobora umutwe wa politike wa TPLF uri ku butegetsi mu ntara ya Tigré, mu butumwa bugufi bwa telefoni yari yabwiye ibiro ntaramakuru by’Abongereza, Reuters, ko umujyi wa Mekelle ukomeje kugabwaho ibitero bikomeye.

Yavuze ko ingabo za Etiyopiya zakoresheje intwaro za rutura, zirasa mu mujyi.

Billene Seyoum, umuvugizi w’ibiro bya ministiri w’intebe wa Etiyopiya we yavuze ko nta ntego ingabo z’igihugu zifite zo kurasa ku baturage no ku mijyi yayo. Yemeje ko Mekelle ikomeje kuba umwe mu mijyi igize Etiyopiya kandi ko umugambi wo guhana abumva ko bari hejuru y’amategeko utazatuma habaho kwibasira inzira karengane.

Yongeyeho ko intego yabo ari ukubumbatira amahoro n’ituze ry’abanya-Eitiyopiya muri Mekelle bahereye ku ntara ya Tigré.

Muri iki gihe biragoye kubona amakuru y’impamo kubera ko amatelefoni, za interineti, imihanda n’ibibuga by’indege bifunze, kuva ingabo za leta zitangije ibitero mu ntara ya Tigré mu byumweru bitatu bishize.

Ku cyumeru gishize ni bwo ministiri w’intebe wa Etiyopia Abiy Ahmed yari yatangaje ko yategetse ingabo za leta gutera umujyi wa Mekelle utuwe n’abantu 500,000. Ni igitero yise icyiciro cya nyuma cy’intambara.

Hagati aho, minisitiri w'intebe wa Etiyopiya, Abiy Ahmed, kuri uyu wa gatanu yakiriye, i Addis Abeba, intumwa zo mu rwego rwo hejuru z'Umuryango w'Afrika yunze ubumwe, ziyobowe n'abahoze ari abakuru b'ibihugu batatu: umutegarugoli Ellen Johnson-Sirleaf wa Liberia, Joaquim Chissano wa Mozambique, na Kgalema Motlanthe w’Afurika y’epfo.

Yabijeje ko azakorana ibishoboka byose kugira ngo leta ibungabunge amahoro n’ituze ku batuye intara ya Tigré. Ibihungu bitandukanye n’imiryango mpuzamahanga bikomeje guhamagarira Etiyopiya guhoshya imirwano ikita ku mutekano w’abasivili mu ntara ya Tigré.

Facebook Forum

XS
SM
MD
LG