Ubushinjacyaha bugiye kugeza Ingabire Umuhoza Victoire imbere y’urukiko. Ubushinjacyaha bwatangaje ko bitarenze ku uyu musi ku wa mbere tariki ya 25 ukwezi kwa 10, mu mwaka wa 2010, buzageza imbere y’urukiko dosiye ikubiyemo ibirego bukurikiranyeho Mme Umuhoza Ingabire Victoire. K’ubushinjacyaha, Ingabire abarizwa mu maboko yabwo kuva ku ya 18, ukwezi kwa 10. Bwavuze ko butazarenza iminsi 7 iteganijwe n’amategeko yo kumugeza imbere y’urukiko.
Akenshi, ubushinjacyaha bugeza abantu imbere y’urukiko, bukagaragaza ibimenyetso bikomeye bituma bukeka ko bakoze ibyaha bubakuriranyeho. Bugasaba urukiko ko rwategeka ko bakomeza gufungwa by’agateganyo mu gihe cy’iminsi 30, bitewe n’impamvu zitandukanye buba bwarugaragarije.
Mme Ingabire yatawe muri yombi ku ya 14, ukwezi kwa 10, mu mwaka wa 2010, na polisi y’u Rwanda. Yatangaje ko imukurikiranyeho ibyaha byo gukorana n’imitwe y’iterabwoba, ayigurira ibirwanisho mu rwego rwo guhungabanya umudendezo w’u Rwanda. Kuva icyo gihe afungiwe kuri station ya polisi ku Kicukiro, mu Mujyi wa Kigali
Mme Umuhoza Ingabire Victoire ni umunyepolitiki utavuga rumwe n’ubutegetsi mu Rwanda , ayobora ishyaka FDU-Inkingi. Yigeze gutabwa muri yombi mu kwezi kwa 4, urukiko rutegeka ko yaguma hanze afungishijwe ijisho.
Kuva yatabwa muri yombi, ishyaka rye FDU-Inkingi ryarabyamaganye, rigaragaza ko urubanza rwe ari “politiki”, ko ibyo bamurega ari ibintu “byahimbwe” na guverinoma y’u Rwanda ikoresheje abantu bo muri FDLR.