Indorerezi z’Umuryango w’Ubumwe bw’Ubulayi Zageze Muri Venezuela

Izo ndorerezi zatangiye imirimo muri Venezuela kuri uyu kuwa kane, ubwo kwiyamamariza amatora y’intara azaba mu kwezi gutaha byatangiraga. Ayo matora azaba arimo n’abakandida batavuga rumwe n’ubutegetsi.

Ni ubwa mbere mu myaka 15, umuryango w’ubumwe bw’ubulayi wohereje indorerezi muri Venezuela.

Amashyaka atavuga rumwe n'ubutegetsi azagira uruhare mu matora ateganyijwe kw’itariki ya 21 y’ukwezi gutaha kwa 11 nyuma yo kutitabira itora rya Perezida n’y’abadepite mu mwaka wa 2018 no mu 2020, amatora bavuze ko Perezida Nicolas Maduro n’ishyaka rye batsinze mu buryo butemewe n’amategeko.

Uyoboye indorerezi, Isabel Santos yabwiye abanyamakuru mbere y’uko zihaguruka mu murwa mukuru Caracas zijya mu yindi mijyi yo mu gihugu ati: "Abatavuga rumwe n’ubutegetsi bazaba bari muri ayo matora, turashaka kwumva buri wese”.

Imyanya irenga 3000, harimo iy’abaguverineri, ba meya n’abajyanama b’amakomini, izamaranirwa mu kwezi gutaha nk’uko ubuyobozi bushinzwe amatora muri Venezuela bubivuga. Abantu bagera muri miliyoni 21 bafite uburengazira bwo gutora imbere y’amategeko.

Indorerezi 44 z’umuryango w’ubumwe bw’Ubulayi nizo zimaze kugera muri Venezuela kugeza ubu. Bazakorera muri leta 22 kuri 23 zigize igihugu nk’uko Santos yabivuze. Yongeyeho ko nta n’umwe muri abo uzoherezwa muri Leta ya Amazonas bitewe n’uko kugerayo bitoroshye hamwe n’icyorezo cya virusi ya corona.

Indorerezi zizatanga raporo za mbere, iminsi ibiri nyuma y’itora. Raporo ya nyuma byitezwe ko izafata amezi abiri, nk’uko bivugwa na Santos, umwe mu bagize inteko ishingamategeko y’Ubulayi, ukomoka muri Portugali.

Indorerezi zizaguma mu bice by'igihugu zizaba zoherejwemo kuzageza kw’itariki ya 29 y’ukwezi gutaha kwa 11.

Ikigo the Carter Center, gifite icyicaro inaha muri Amerika, na cyo kirateganya kwohereza muri Venezuela, inzobere enye mpuzamahanga muri ayo matora, mu ntangiriro z’uku kwezi gutaha.