Muri Leta zunze ubumwe z'Amerika, nyuma y'ishyaka ry'Abademokarate mu cyumweru gishize, Abarepubulikani nabo baratangira inama kaminuza yabo kugirango bemeze kandidatire ya Donald Trump mu matora y'umukuru w'igihugu yo mu kwa 11 gutaha.
Inama y'Abarepubulikani izaba itandukanye n'iy'Abademokarate yabereye ku buhanga bw'amashusho ya videwo. Yego n'Abarepubukani nabo bazabukoresha, ariko igice kinini cy'inama kizaba nk'uko bisanzwe abantu bahura muri mitingi, batitaye ku cyorezo cya virusi ya Corona. Usibye abantu imaze guhitana barenga ibihumbi 175 muri Leta zunze ubumwe z'Amerika, yatumye n'ubukungu bw'igihugu bwitura hasi cyane, abantu amamiliyoni batakaza akazi kari kabatunze.
Abarepubulikani bazihatira kwemeza abaturage ko Perezida Trump akwiye manda ya kabiri, bahereye ku byo politiki ye yagezeho mbere y'iki cyorezo kandi ko ashobora gukora ibirenzeho aramutse yongeye gutorwa, no kwerekana ko, kuri bo, "kandida w'Abademokarate Joe Biden adashoboye."
Muri iyi nama, Perezida Trump ubwe azajya avuga ijambo buri munsi, bitandukanye na Joe Biden warivuze rimwe gusa ku munsi wa nyuma w'inama kaminuza y'Abademokarate mu cyumweru gishize. No ku munsi wa nyuma w'inama yabo, kuwa kane, azavuga ijambo rya nyuma, yemera ku mugaragaro ko azahagarira ishyaka rye mu matora yo mu kwa 11. Azarivugira kuri Maison Blanche aho akorera. Abademokarate barabyamagana bavuga ko bidakwiye kubera ko ari inyubakwa ya rubanda rwose, atari iy'Abarepubulikani.
Facebook Forum