Uyu munsi, Inama Rusange y'Umuryango w'Abibumbye iratangiza inama y'iminsi ibiri yo mu rwego rwo hejuru ku cyorezo cya virusi ya Corona n'ingamba zikwiye.
Inama irahuza abayobozi b'isi barenga ijana bakoresheje ubuhanga bw'amashusho. Umuvugizi wa perezida w'Inama Rusange ya ONU, Volkan Bozkir, asobanura ko iri koraniro rigomba gushyiraho uburyo bwo guhuza ibikorwa ku rwego rw'isi hagati y'ibihugu, Umuryango w'Abibumbye n'amashami yawo, n'abikorera ku giti cyabo.
Abayobozi b'isi bagomba kubanza kurebera hamwe ibyakozwe kugeza ubu mu rwego rwo kurwanya Covid-19, cyane cyane ku birebana n'ubushakashatsi ku nkingo zayo, n'ingamba zo kuzahura ubukungu bw'isi yose bwituye hasi cyane. Ingaruka zabyo, nk'uko ONU ibivuga, abantu miliyoni zirenga 200 bashobora kugwa mu bukene bwa nyakujya, ku buryo abaturage b'isi barenga miliyari imwe bashobora kuzaba bamaze kubugeramo mu mwaka 2030.
Iyi nama yo mu rwego rwo hejuru muri ONU ibaye uyu munsi Covid-19 imaze kwica abantu bagera kuri miliyoni imwe n'igice kw'isi yose. Leta zunze ubumwe z'Amerika iri ku isonga kurusha ibindi bihugu n'abantu bamaze guhitanwa na virusi ya Corona hafi ibihumbi 274. Ibitangazamakuru binyuranye bivuga ko abahoze bayobora Leta zunze ubumwe z'Amerika Bill Clinton, George W. Bush, na Barack Obama bashobora kuzafatira urukingo rwa Covid-19 kuri televiziyo.
Facebook Forum