Urukingo rwonyine ntiruhagije kugirango ibya Covid-19 bisubire mu buryo. Ni umunyamabanga mukuru w'Umuryango w'Abibumbye, Antonio Guterres, wabitangaje mu nama idasanzwe y'abakuru b'ibihugu by'isi yose ku cyorezo cya virusi ya Corona.
Ni inama yatangiye ejo ikaba iri busozwe kuri uyu wa gatanu ku cyicaro gikuru cy'Umuryango w'Abibumbye i New York ariko ku buhanga bw'amashusho.
Ikoranyije abakuru b'ibihugu, abaminisitiri b'intebe, n'abaminisitiri b'ubuzima barenga 140. Buri wese afite ijambo ry'iminota itanu kuri videwo agomba kuba yarohereje mbere. Abakuru b'ibihugu bya Leta zunze ubumwe z'Amerika, Ubushinwa n'Uburusiya bo ntibayirimo: batumye abaminisitiri.
Mu ijambo rye, Antonio Guterres yikomye ibihugu bimwe na bimwe, atavuze amazina, kugeza n'ubu uhereye kuva Covid-19 icyaduka hashize umwaka, bigisuzugura amakuru n'inama za OMS, ishami ry'Umuryango w'Abibumbye ryita ku buzima. Ati: "Iyo buri gihugu kikoreye ibyacyo bwite, virusi inyanyagira hose."
Umunyamabanga mukuru wa ONU yashimye akazi k'abahanga n'abashakashatsi bo kw'isi yose ku nkingo za virusi ya Corona. Ati: "Zishobora kuboneka mu byumweru cyangwa amezi make ari imbere. Ariko ntitwibeshye. Urukingo rwonyine gusa ntirushobora gusana ingaruka zose za Covid-19, zizamara imyaka n'utwaka."
Yibukije zimwe na zimwe muri izi ngaruka: ubukene bukabije cyane, ibyorezo, inzara zugarije ibihugu byinshi, n’ubukungu bw'isi bwituye hasi nabi cyane bwa mbere muri iyi myaka 80 ishize. Kuri Antonio Guterres, "tugomba kongera gutangirira kuri zeru kugirango turwanye ubusumbane bukabije n'akandi karengane kose byashyizwe ku karubanda n'iki cyorezo cya Covid-19."
Ati: "Birasaba ubushake n'ingufu bya buri muntu wese, guverinoma z'ibihugu byose, abikorera ku giti cyabo, sosiyete sivili, n'ubufatanye mpuzamahanga."
Perezida w'Inama Rusange ya ONU, Volkan Bozkir, nawe yavuze ko iyi nama idasanzwe ari akataraboneka, izerekana koko "niba isi ifite ubushake bwo gushyira hamwe."
Facebook Forum