Muri Myanmar, abapolisi batangiye kurwanya abaturage bari mu myigaragambyo yo kwamagana kudeta. Abantu bataramenyekana umubare bakomeretse, bamwe bashobora kuba bafashwe n'amasasu y'intambara. Uyu ni umunsi wa kane wikurikinyije w'imyigaragambyo mu gihugu hose.
Kubera ukuntu abaturage bagenda biyongera mu mihanda, baba ibihumbi n'ibihumbi buri munsi kurushaho, leta y'abasilikali yashyizeho amasaha y'umukwabu n'abuza gukora imyigaragambyo. Birabujijwe ko abantu barenze batanu bahurira hamwe kuva saa mbiri y'ijoro kugera saa kumi mu rukerera.
Polisi yarashe mu baturage n'amasasu y'intambara. Ibitangazamakuru ntibivuga rumwe ku mubare w'abantu bakomeretse. Hari ibivuga babiri. Hari ibivuga bane. Ibindi ngo ni 20. Ariko umuganga utashatse ko dutangaza amazina ye ukora mu bitaro mu murwa mukuru, Naypyitaw, yabwiye Ijwi ry'Amerika ko hari byibura umukobwa umwe w'imyaka 20 wakomerekejwe cyane n'isasu ryamurashe mu mutwe. Abaganga bavuga ko afite amahirwe make yo kubaho. Yatubwiye ko hari undi muntu w'imyaka 23 warashwe mu gituza.
Umukuru w'igihugu wahiritswe ku butegetsi, umutegarugoli Aung San Suu Kyi, n'abandi bayobozi bo mu nzego zitandukanye z'igihugu n'iz'ishyaka rye, National League for Democracy (NLD), baracyafunze, nk'uko umuvugizi we wabitangaje. Naho umukuru w'abasilikali bafashe ubutegetsi, General Min Aung, yavuze ijambo rye rya mbere nyuma ya kudeta. Ariko ntiyigeze akomoza na gato ku myigaragambyo. Si ubwa mbere ubutegetsi bwa gisilikali bwishe abaturage bari mu myigaragambyo muri Myanmar. Byarabaye no mu 1988, bahitana abantu barenga ibihumbi icumi.
Facebook Forum