Ibisasu byaturitse, bikurikiwe no kurasa n'imbunda, mu gihe minisitiri w'intebe wa Yemen, Abdulmalik Saeed, n'abaminisitiri be, barimo bururuka indege yari ibavanye i Riyadh, umurwa mukuru w'Arabiya Sawudite. Bamwe bahise biruka basubira mu ndege, abandi bakwirwa imishwaro bashakisha aho bihisha, naho abandi baryama hasi.
Ariko minisitiri w'intebe Saeed yanditse kuri Twitter ko bose ntacyo babaye. Ntawapfuye. Nta n'uwakomeretse. Abashinzwe umutekano wabo babirukankanye bwangu bwangu, babakura ku kibuga cy'indege. Ariko igitero cyahitanye abantu 26, gikomeretsa abandi barenga 50. Nta mutwe n'umwe wari urakiyitirira. Ariko Aba-Houthis bo batangaje ko atari bo bagikoze.
Hashize amasaha make, ibindi bisasu byaturikiye hafi y'ingoro ya leta yitwa Maasheq, mu mujyi wa Aden, aho guverinoma ya Yemen yahungiye nyuma y'igitero cyo ku kibuga cy'indege. Ntibiramenyekana niba hari abo byahitanye.
Guverinoma ya Yemen yari igarutse Aden, ivuye i Riyadh aho yimikiwe mu cyumweru gishize. Ubundi yakoreraga mu buhungiro aho mu murwa mukuru w'Arabiya Sawudite. Perezida wa Yemen, Mansour Hadi, we ni ho agikorera n'amahanga hamwe n'Umuryango w'Abibumbye. Hadi, ni ho yari amaze kuvugururira guverinoma ye, ihita ijya gukorera Aden, umurwa mukuru wa Yemen y'amajyepfo.
Umurwa mukuru w'igihugu cyose, Saana, wigaruriwe n'inyeshyamba z'Aba-Houthis mu 2014. Kuva icyo gihe, intambara yo muri Yemen imaze guhitana abantu barenga ibihumbi 112.
Facebook Forum