Karm Gilespie, ni umuturage wa Australia wari ufungiye mu Bushinwa kuva mu mwaka wa 2013. Yafatiwe mu mujyi wa Guangzhou afite ikiyobyabwenge cyitwa Methamphetamine. Amakuru y'uko Ubushinwa bwamukatiye igihano cy'urupfu yamenyekanye mu cyumweru gishize. Uyu mugabo w'imyaka 56 afite icyumweru kimwe cyo kujuririra icyo cyemezo.
Ministri w'Intebe wa Australia, Scott Morrison yavuze ko igihugu cye kitavuga rumwe n'Ubushinwa kuri icyo gihano, yemeza ko ubutegetsi bwe buzagerageza gufasha uwo muturage wa bwo uri mu kangaratete.
Igihano cy'urupfu cyongereye urunturuntu hagati y'Australia n'Ubushinwa kuko Australia ishyigikiye iperereza ryimbitse ku nkomoko y'indwara ya Covid 19 yagaragaye bwa mbere mu mujyi wa Wuhan wo mu Bushinwa. Hari kandi n'ikibazo cy'ibivugwa ko Ubushinwa bwaba bwivanga mu miyoborere y'Australia no mu kuyineka bubinyujije mu ikoranabuhanga.
Ibi bihugu byombi bisanzwe bifitanye umubano ushingiye ku bucuruzi. Mu mwaka wa 2017 Australia yohereje ibicuruzwa bifite agaciro ka miliyari $85.7. Hasize ibyumweru bicye ubushinwa buburiye ba mukerarugendo n'abanyeshuri ko Australia ifite ivangura ritewe n'ikiza cya virusi ya Corona.
Facebook Forum