Uko wahagera

Ibikorwa bya Gisilikare Biriyongera mu Nyanjya y'Amajyepfo y'Ubushinwa


Ministeri y'ingabo y'Ubuhinde yatangarije ku rubuga rwayo rwa interineti ko ubwato bwayo bw'intambara buburi n'ubundi bwa Viyetinamu byaguye ibikorwa by'imyitozo mu cyumweru gishize bihereye ku cyambu cya Viyetinamu.

Bakoze ibikorwa byo kurasa intego no gutwara za kajugujugu z'intambara bogoga ikirere cy'imuhengeri. Ubuhinde bwavuze ko iyi myitozo ari igikorwa cyo kongera ubwato bw'intambara mu nyanja y'amajyepfo y'Ubushinwa gikomeje. Bwemeza ko ari intambwe yo gushimangira ubufatanye bwabwo na Viyetinamu mu bya gisirikare.

Mu yindi myitozo yabereye muri iyo nyanja cyangwa bugufi bwayo, ubwato bw'intambara bwa Canada bwasanze ubundi bwa Ositiraliya, Ubuyapani n'Amerika bitegura kuzafatanya imyitozo mu kwa mbere. Ubwato bwa Ositiraliya, Ubuhinde, Ubuyapani na Leta zunze ubumwe z'Amerika bwashyize gahunda ngarukamwaka y'imyitozo ya gisirikare bihuriyeho yiswe Malabar ku italiki 26 kugeza 29 z'ukwa munani. Iyo myitozo izabera hafi y'ikirwa cya Guam. Ni bwo butaka bwa Leta zunze ubumwe z'Amerika bwegereye Aziya.

Ubushinwa buvuga ko 90 ku ijana by'iyi nyanja ifite kilometerokare miliyoni 3.5 ari amazi yabwo. Nyamara ibindi bihugu bitanu na byo bikavuga ko ayo mazi ari ayabyo. Ubushinwa bugaragaza inyandiko zibyemeza za kera mu myaka ibarirwa mu bihumbi mbere y'ivuka rya Yezu. Ibyo bihugu byo bigashingira ku masezerano y'Umuryango w'Abibumbye yerekeye imikoreshereze y'amazi y'inyanja.

Abashakashatsi baravuga ko ubwato bwa gisirikare bw'Ubushinwa bugiye kongera amarondo bwakoraga n'imyitozo ya gisirikare muri iyi nyanja. Abayobozi bakuru b'igisirikare cy'Ubushinwa bo batangaje ko ibikorwa byabo muri iyi nyanja bishingira ku byakozwe n'Amerika. Bavuze ko ingabo zabo ziri muri iyi nyanja ziryamiye amajanjya kandi ziteguye ku rwego rwo hejuru kurengera ubusugire bw'Ubushinwa igihe icyo aricyo cyose bwavogerwa.

Facebook Forum

XS
SM
MD
LG