Ba minisitiri b'ububanyi n'amahanga b'ibihugu birindwi bya mbere bikize ku isi, G-7, bateraniye i Londres mu Bwongereza. Mu byo baganiraho harimo icyorezo cya Covid, Ubushinwa n'Uburusiya.
Iyi nama izamara iminsi itatu. Irategura iy'abakuru b'ibihugu bya G-7 nayo izabera mu Bwongereza mu kwezi kwa gatandatu gutaha. Ni iya mbere ya ba minisitiri b'ububanyi n'amahanga ba G-7 amaso mu yandi kuva icyorezo cya Covid cyadutse.
Iya nyuma bakoreye hamwe yabereye mu Bufaransa mu kwezi kwa kane 2019. Ubundi bahuriraga ku ikoranabuhanga bwa videwo. Minisiteri y'ububanyi n'amahanga y'Ubwongereza yatangaje ko yafashe ingamba zo kwirinda virusi ya Corona muri iyi nama, birimo gupima buri munsi abayirimo bose.
Usibye iki cyorezo, gahunda ya ba minisitiri b'ububanyi n'amahanga iriho n'Uburusiya. Ubwongereza bwatangaje ko bagomba gufata ingamba zo gukumira "amakuru y'ibinyoma n'ibihuha Uburusiya bukwirakwiza" muri bimwe mu bihugu bya G-7.
Hariho kandi n'Ubushinwa, ku bibazo by'ubucuruzi, amavu n'amavuko ya Covid yaturutse mu Bushinwa, n'uburenganzira bwa muntu, by'umwihariko ku ba-Uighur, Abashinwa bo mu idini ry'Abayisilamu, biganje mu ntara ya Xinjiang," yo mu majyaruguru y'uburengerazuba bw'Ubushinwa.
Mu kwezi kwa gatatu gushize, Leta zunze ubumwe z'Amerika, Umuryango w’ubumwe bw’ibihugu by’Ubulayi, Ubwongereza na Canada bafatiye ibihano Ubushinwa kubera ikibazo cy'aba-Uighur.
Ba minisitiri b'ububanyi n'amahanga ba G-7 baraganira kandi no kuri Irani na gahunda yayo ya nucleaire, no kuri Afuganistani n'itahuka ry'ingabo mpuzamahanga.
G-7 igizwe na Leta zunze ubumwe z'Amerika, Canada, Ubwongereza, Ubufaransa, Ubutaliyani, Ubudage, n'Ubuyapani. Muri iyi nama yabo batumiyemo bwa mbere na mbere n'ibindi bihugu bitayirimo, ari byo Afrika y'epfo, Australia, Koreya y'Epfo, Brunei, n'Ubuhinde, Umuryango w'ubumwe bw'Ubulayi na Asean (umuryango w'ibihugu icumi byo mu karere k'Aziya yo mu burasirazuba bw'amajyepfo).
Facebook Forum