Uko wahagera

Ibiciro by’Amasoko y’Imali n’Imigabane muri Aziya Vyamanutse


Ibiciro by’amasoko y’imali n’imigabane ku mugabane w’Aziya byamanutse nyuma y’aho abashoramali batunguriwe n’uko muri Leta zunze ubumwe z’Amerika abadepite batashoboye gutora itegeko ryemeza ingengo y’imari y’inyunganizi ku bihombo byatewe n’icyorezo cya virusi ya Corona.

Sena y’Amerika yasaga n’ishaka kwemeza ku cyumweru ko hatangwa tiriyali $2 zo kunganira ubukungu bw’igihugu ariko ntibyakunze kuko Abademokrate bavuze ko iryo tegeko risa n’irigamije kwihera amafaranga ibigo binini kuruta uko yahabwa umuturage usanzwe w’Umunyamerika.

Isoko ry’imali n’imigabane rimaze gutakaza agaciro ryari rifite hafi ku rugero rwa 30% mu gihe cy’ukwezi kumwe. Icyo gihombo cyatewe n’icyorezo cya Virusi ya Corona cyatumye abantu badasohoka ngo ibikorwa by’ubucuruzi bikomeze uko byakagombye. Ibiciro bya peteroli na byo bikomeje kumanuka ku rwego mpuzamahanga, akagunguru ka peteroli kageze ku $26.

Mu Buhinde isoko Sensex ry’i Mumbai ni ryo ryahuye n’igihombo kinini kigera ku 10% rikurikirwa na ASX ryo muri Australia ryagize igihombo cya 6%. Shanghai mu Bushinwa igihombo cyageze kuri 3% naho Hang Seng ryo muri Hongkong rihomba hafi 5%.

Amasoko abiri gusa Nikkei ryo mu Buyapani na TSEC ryo muri Taiwan ni yo yabashije kunguga rimwe 2% irindi 6% uko akurikirana. Abacuruzi bashobora kuba batewe agatege n’uko akanama gakuriye imikino mpuzamahanga ya Olempike karimo kwiga ku isubikwa ry’iyagombaga kubera i Tokyo mu Buyapani mu gihe cy’impeshyi kiri imbere.

Facebook Forum

XS
SM
MD
LG