Uko wahagera

Hong Kong: Umuherwe Jimmy Lai Yarekuwe Atanze Ingwate


Umuherwe Jimmy Lai (hagati) mu maboko y'abapolisi bamujyanye mu rukuko
Umuherwe Jimmy Lai (hagati) mu maboko y'abapolisi bamujyanye mu rukuko

Umuherwe wo mu mujyi wa Hong Kong uzwi mu bucuruzi bw'ibitangazamakuru akaba n'umwe mu mpirimbanyi za demokarasi, Jimmy Lai, yarekuwe atanze ingwate nyuma y'ibyumweru bitatu afunzwe.

Urukiko rukuru muri uwo mujyi rwarekuye uyu mugabo w'imyaka 73 kuri uyu wa gatatu amaze gutanga ingwate ya miliyoni 1.2 y'amadorari. Yabujijwe gukoresha urubuga rwa Twitter, gutanga amakuru, cyangwa gukorana n'ingabo z'ikindi gihugu.

Uyu nyir'ikigo cy'itangazamakuru cyitwa Next Digital Media yatawe muri yombi taliki 3 z'ukwa 12 aregwa icyaha cy'ubushukanyi bugamije indonke. Abashinjacyaha bamureze kurenga ku mabwiriza arebana n'ubukode bw'ibiro by'ikigo cye. Bamurega kandi kwica itegeko rishya rirebana n'ibyumutekano bavuga ko yakoranye n'abanyamahanga babangamiye ubutegetsi.

Jimmy Lai yatawe muri yombi bwa mbere mu kwezi kwa munani akekwaho gukorana n'abari hanze y'igihugu babangamiye ubutegetsi. Nyuma y'amasaha make afashwe, abapolisi barenga 100 bakwiriye ku nyubako ibiro by'ikigo cye cy'itangazamakuru cyitwa Next Media gikoreramo, ahandikirwa ikinyamakuru Apple Day. Icyo kinyamakuru cyerekanye kuri murandasi uko abo bapolisi binjiraga mu cyumba abanyamakuru bakoreramo basaka ibintu byose byabo. Icyo gihe Lai bamusohokanye bamwambitse amapingu ariko aza kurekurwa hashize amasaha 40.

Facebook Forum

XS
SM
MD
LG