Uko wahagera

Guverinoma y'Amerika Irarega Facebook Gushaka Kwiharira Isoko


Facebook yaguze Instagram amadolari miliyari imwe mu 2012. Yaguze WhatsApp amadolari miliyari 22 mu 2014.

Guverinoma ya Leta zunze ubumwe z'Amerika irarega Facebook gushaka kwiharira isoko. Bityo irashaka ko inkinko ziyitegeka gutandukana na Instagram na WhatsApp.

Facebook yaguze Instagram amadolari miliyari imwe mu 2012. Yaguze WhatsApp amadolari miliyari 22 mu 2014. Ni ibigo bibiri biri mu bindi bigera kuri 70 Facebook yaguze muri iyi myaka 15 ishize. Ariko ni byo abanenga Facebook bavuga ko ikwiye gutandukana nabyo.

Ejo kuwa gatatu, Komisiyo y'igihugu ishinzwe ubucuruzi (Federal Trade Commission-FTC), leta 48, District ya Columbia irimo umujyi wa Washington, umugwa mukuru wa Leta zunze ubumwe, n'ikirwa cya Guam cya Leta zunze ubumwe z'Amerika kiri mu nyanja ya Pasifika, batanze ibirego bibiri mu nkiko, bavuga ko Facebook yaguze ziriya mbuga nkoranyambaga ebyiri imaze kubona ko zishobora kuyipiga kw'isoko.

Abarega basanga binyuranyije n'amategeko agenga ubwisanzure bw'ubucuruzi, gushaka kwiharira isoko no kuniga ibigo bito bito bigitanguza. Kuri bo, nk'uko babivuga mu kirego cyabo, ntibiha rubanda amahirwe yo kwihitiramo imbuga nkoranyambaga bumva yaba ibabereye, kwiharira isoko ry'abamamaza ibicuruzwa byabo kandi ku biciro nabo batihitiyemo kuko nta handi bashobora kujya, no guhonyora uburenganzira bwa rubanda ku mabanga y'ubuzima bwabo bwite.

Bityo barasaba inkiko gutegeka Facebook kugurisha Instagram na WhatsApp.

Umunyamategeko mukuru wa Facebook, Jennifer Newstead avuga ko guverinoma ifite indimi ebyiri. Ati: "Ku ruhande rumwe guverinoma ishyigikiye ibigo by'ubucuruzi bitera imbere, kandi yaduhaye uburenganzira bwo kugura Instagram na WhatsApp. None, ku rundi ruhande, ngo nitwongere natwe tuzigurishe." Kuri Facebook, ibi birego biratanga ubutumwa butari bwiza ku bigo by'ubucuruzi ko "iyo uguze ikindi kigo biba bitarangiriye aho, guverinoma ishobora kukikwambura."

Jennifer Newstead avuga ko bazaburana n'imbaraga zabo zose.

Facebook ni cyo kigo cya mbere cy'igihangange mu by'imbuga nkoranyambaga. Ikoreshwa n'abantu miliyari ebyiri na miliyoni 700 kw'isi yose. Isoko ryayo rifite agaciro k'amadolari agera kuri miliyari 800. Mu mwaka ushize wonyine gusa, abayikozeho ibyo kwamamaza ibicuruzwa byabo bayinjirije amadolari arenga miliyari 70. Naho umuyobozi mukuru wa Facebook, Mark Zuckerberg, aza ku mwanya wa gatanu mu baherwe ba mbere bo kw'isi yose.

Uretse Facebook, guverinoma ya Leta zunze ubumwe z'Amerika yahagurukiye n'ibindi bigo bikomeye cyane by'ikoranabuhanga, Google, Amazon, Apple na Microsoft. Ivuga ko byose byikorera icyo bishatse, ntawe ubigenzura. Abagize inteko ishinga amategeko basanga bikwiye kurangira.

Facebook Forum

XS
SM
MD
LG