Uko wahagera

Ejo Ubulayi Buzatangira Gutanga Urukingo rwa Covid-19


Hirya no hino ku isi hakomeje kugaragara abandura ubwoko bushya bwa virusi ya Corona.

Ubufaransa bwakiriye inkingo za mbere za virusi ya Corona zakozwe n'ibigo Pfizer na BioNTech kuri uyu wa gatandatu. Byashyikirijwe urwunge rw'amazu acuruza imiti (farumasi) i Paris mu murwa mukuru w'icyo gihugu.

Biteganijwe ko inkingo zizatangira gutangwa ku batuye mu mazu abiri acumbikira abageze mu za bukuru ejo ku cyumweru. Ni na bwo uru rukingo ruzatangira gutangwa mu Bulayi hose.

Ubufaransa bwatangaje ko abarenga miliyoni 2.6 banduye virusi ya Corona, muri bo abagera kuri 63,500 bahitanwa na yo. Abakozi b'inzego z'ubuvuzi mu Bufaransa batangaje ko babonye umuntu wa mbere wanduye ubwoko bushya bwa virusi ya Corona iheruka kwaduka mu Bwongereza igatuma abantu basubira muri gahunda ya "guma mu rugo" ndetse bigatuma ibihugu bitandukanye hirya no hino ku isi bihagarika ingendo zijya cyangwa ziva mu Bwongereza.

Inkingo za mbere za Pfizer-Bio╬ŁTech kandi zageze i Bucharest mu murwa mukuru wa Rumaniya kuri uyu wa gatandatu. Zibitse mu kigo cya gisirikare aho zizakurwa zitangira gutangwa ku munsi w'ejo ku cyumweru nkuko iyo gahunda itegenijwe mu Bulayi hose.

Kuri uyu wa Gatandatu, itangazamakuru ryo mu Burusiya ryatangaje ko ministeri y'ubuzima muri icyo gihugu yemeje ikoreshwa ry'urukingo rwa virusi ya Corona rukorerwa mu Burusiya rwiswe Sputnik V. Ruzatangira gukoreshwa ku barengeje imyaka 60. Nkuko imibare igaragaza muri icyo gihugu abanduye virusi ya Corona bamaze kurenga miliyoni 3 kuri uyu wa gatandatu. Abagera ku 29,200 bayanduye mu gihe cy'umunsi umwe, naho 560 bahitanywe na yo mu masaha 24 ashize.

I Tokyo mu Buyapani uyu munsi imibare y'abanduye icyo cyorezo yongeye kuzamuka kurenza urugero ro hejuru rwari rusanzwe. Kimwe no mu Bufaransa kandi, Ubuyapani bwatangaje ko habonetse abantu ba mbere banduye virusi ya Corona y'Ubundi bwoko. Bageze muri icyo gihugu hagati y'italiki 18 na 21 barapimwa boherezwa mu kato nyuma biza kugaragara ko bayanduye.

Mu Bwongereza inzego z'ubutegetsi zemeje ko bigaragara ko abantu bandura mu buryo bworoshye ubwoko bushya bwa virusi ya Corona. Ni yo mpamvu ibihugu bitandukanye hirya no hino ku isi byahagaritse ingendo ziva cyangwa zija muri icyo gihugu.

Muri Leta zunze ubumwe z'Amerika inzego z'ubuyobozi ku wa kane zatangaje ko abagenzi bavuye mu Bwongereza bagomba kubanza kwipimisha bakagaragaza ko batarwaye Covid 19 mbere y'uko bafata indege. Ibigo bishinzwe kurwanya no gukumira indwara muri Amerika byatangaje ko ibi bigomba kubahirizwa uhereye ku wa mbere.

Ejo kuwa gatanu mu butumwa bwe bwo ku minsi wa Noheli Papa Fransisiko yasabye ko inkingo za Covid 19 zigera kuri bose. Yasabye abayobozi mu nzego za politike n'izubucuruzi kwimakaza ubufatanye aho gushyira imbere kurushanwa mu gutanga izo nkingo

Muri Isirayeli ho batangaje ko igihugu kigiye kwinjira muri gahunda ya "guma mu rugo" ku nshuro ya gatatu uhereye ejo ku cyumweru mu rwego rwo gukumira virusi ya Corona. Iyo gahunda bazayimaramo ibyumweru bibiri.

Naho mu Bushinwa abakozi bo mu nzego z'ubuvuzi mu mujyi wa Dulan barapima abantu babarirwa mu za miliyoni nyuma y'aho bitangarijwe ko habonetse abantu barindwi banduye virusi ya Corona mu masaha 24 ashize. Inzego z'ubutegetsi zategetse abantu bose kuguma mu rugo uretse abakora imirimo idashobora gusiba.

Facebook Forum

XS
SM
MD
LG