Umugabo wayobeje indege itwara abagenzi ya Misiri akayitegeka kugwa mu birwa bya Chypre yatawe muri yombi. Abari bagizwe ingwate nabo barekuwe nk’uko abategetsi bo muri ibyo birwa babitangaje.
Bagize bati: “Abagenzi bose n’abakozi bo mu ndege baratekanye”. Ibi byanditswe ku rubuga rwa "Tweeter" n’umuvugizi wa guverinema Nikos Christodoulides, amasaha nyuma y’uko indege iguye ku kibuga cy’indege cya Larnaca kuwa kabiri taliki 29 ukwezi kwa 3 umwaka wa 2016.
Abategetsi bo mu birwa bya Chypre n’aba Misiri, batangaje amazina y’uwari wayobeje iyo ndege ya Misiri. Bavuze ko ari Seif el-Din Mustafa. Cyakora icyatumye yigarurira iyo ndege "EgyptAir" ntikiramenyekana. Iyo ndege yari ivuye Alexandria yerekeje i Kayiro.
Perezida w’ibirwa bya Chypre, Nicos Anastasiades, yavuze ko kuyobya iyo ndege nta sano bifitanye n’iterabwoba.