Uko wahagera

Covid -19 Imaze Guhitana Abarenga Miliyoni Eshatu ku Isi


Umubare w'abicwa na Covid 19 uvuye kuri miliyoni ebyiri ugera kuri eshatu mu gihe cy’amezi atatu gusa.

Umubare w'abantu bamaze gupfa bazira Covid 19 ku isi umaze kurenga miliyoni eshatu. Amakuru dukesha ibiro ntaramakuru by’Abongereza Reuters, agaragaza ko ubwo bwiyongere ahanini bwatewe n’ubwoko bushya bwa virusi ya corona bwabonetse bwa mbere mu Bwongereza no muri Afurika y’epfo, no kuba abantu benshi batacyubahiriza amabwiriza ya guma mu rugo kubera kurambirwa.

Uyu mubare uvuye kuri miliyoni ebyiri ugera kuri eshatu mu gihe cy’amezi atatu gusa. Igihugu cya Bresil ni cyo muri iyi minsi gipfusha abantu benshi ku munsi. Ku bantu bane bapfa ku munsi bazize Covid 19, ku isi, umwe aba ari Umunyabresil.

Ishami ry’umuryango w’abibumbye ryita ku buzima OMS ryatangaje ko rihangayikishijwe n’ubwiyongere bw’impfu muri Bresil n’ibibazo bikomeye imaze gusigira inzego z’ubuzima muri icyo gihugu.

Ahandi havugwa ubwiyongere bw’imibare y’abandura Covid 19 ni mu gihugu cy’Ubuhinde, aho umubare w’abandura umaze kurenga 100,000 ku munsi. Leta ya Maharashtra, imwe mu zivugwamo ubwandu bwinshi kuri uyu wa mbere yategetse ko amazu y’ubucuruzi, sinema, ububari, n’insengero bifungwa.

Kugeza ubu Leta zunze ubumwe z’Amerika ni yo iza ku mwanya wa mbere w’ibihugu bimaze gupfusha abantu benshi. Abagera 555,000, ni bo bamaze kwicwa na Covid 19. Ariko hari icyizere cy’uko umuvuduko wo gukwirakwiza inkingo mu baturage bayo bishobora kugabanya izo mpfu, no kwandura iyo ndwara.

Facebook Forum

XS
SM
MD
LG