Ikigo gikora ubushakashatsi kuri virus ya Corona muri kaminuza ya Johns Hopkins yo muri Leta zunze ubumwe z'Amerika cyatangaje ko abamaze kwandura iyo ndwara ku isi bageze kuri miliyoni 177.8 mu gihe imaze guhitana abagera kuri miliyoni 3.8.
Leta zunze ubumwe z'Amerika iracyari ku isonga mu kugira umubare munini w'abanduye ubu bamaze kugera kuri miliyoni 3.8; igakurikirwa n'Ubuhinde bugeze kuri miliyoni 29.8.
Perezida w'Ubufaransa Emmanuel Macron na Chancelier w'Ubudage Angela Merkel, basabye ibihugu byo mu muryango w'Ubumwe bw'Ubulayi kuba maso bikirinda ikwirakwira ry'ubundi bwoko bushya bwa virusi ya Corona. Basabye kandi ibihugu byo muri uwo muryango guhuza ingamba zirebana no kudohora ingamba zo kwirinda Covid 19.
Macron yavuze ku Bwongereza buherutse gusubika gahunda zo koroshya ingamba zo gukumira Covid 19 kubera ubwoko bushya bwa virus ya Corona bwitwa delta bukomeje kugaragara muri icyo gihugu. Bwagaragaye bwambere mu Buhinde.
Merkel we yavuze ku buryo ibintu bishobora guhinduka vuba atanga urugero ku byabaye muri Portugal iherutse guhagarika ingendo z'abava n'abaya mu murwa mukuru Lisbon kubera ubwoko bushya bwa virusi ya Corona.
Muri Uganda ho leta yongeye gutangaza gahunda ya 'guma mu rugo' mu gihugu hose kubera umubare w'abakomeje kwandura iyi ndwara.
Inzego zishinzwe iby'ubuzima muri icyo gihugu ziravuga ko abandura iyo ndwara ku munsi bamaze kugera ku 1400 mu gihe ihitana abagera kuri 30 buri munsi.
Facebook Forum