Uko wahagera

Biden Yahisemo William Burns nk'Umuyobozi w'Ikigo cy'Ubutasi CIA


William Burns akiri ministri w'ububanyi n'amahanga wungirije mu kwa Gatatu 2014.

Joe Biden, watorewe kuzaba perezida wa Leta zunze ubumwe z'Amerika, yatangaje ko yahisemo umudipolomate w'inararibonye witwa William Burns kugira ngo azamubere umuyobozi w'ikigo cy'ubutasi CIA.

William Burns afite imyaka 64 y'amavuko. Nk'uko itangazo ry'ibiro bya Joe Biden ribivuga, 33 yayimaze muri dipolomasi, mu bihe by'ubutegetsi bw'abaperezida batandukanye bava mu mashyaka yombi, iry'Abademokarate n'iry'Abarepubulikani.

Mu milimo yakoze, yabaye ambasaderi wa Leta zunze ubumwe z'Amerika muri Jordania kuva mu 1998 kugera mu 2001 ku butegetsi bwa Perezida Bill Clinton w'Umudemokarate, no mu Burusiya kuva mu 2005 kugera mu 2008 ku butegetsi bwa Perezida George W. Bush w'Umurepubulikani. Mu 2011, Perezida Barack Obama w'Umudemokarate yamugize minisitiri wungirije w'ububanyi n'amahanga kugera mu 2014.

Muri uyu mwaka w'2014, William Burns yagiye mu kiruhuko cy'izabukuru ariko ahita ajya kuyobora ikigo cyigenga giharanira amahoro mpuzamahanga cyo muri Leta zunze ubumwe z'Amerika cyitwa Carnegie Endowment of International Peace.

Sena niyemeza William Burns, azasimbura umutegarugoli Gina Haspel, utegeka CIA kuva mu 2018. Azaba kandi abaye umudipolomate wa mbere w'umwuga utegetse CIA. Joe Biden asobanura ko yamuhisemo kubera ko "basangiye imyumvire n'imyemerere ko imilimo y'ubutasi igomba gutandukana na politiki."

Facebook Forum

XS
SM
MD
LG