Banki zishinzwe amajyambere mw’itsinda G7 ry’ibihugu bikungahaye, zarahiriye guha Kompanyi zo muri Afrika, miliyari zirenga 80 z’amadolari. Izo banki z’iterambere zikomeye zo mu bihugu bikize kurusha ibindi kw’isi, ziyemeje ko zizatanga ayo madolari ku myaka itanu iri imbere.
Ikigega mpuzamahanga cy’Imali, FMI, kigereranya ko Afurika yo mu majyepfo ya Sahara, izakenera inyongera ya miliyari 425 z’amadolari uhereye ubu kugeza mu mwaka wa 2025. Ayo agenewe kurwanya COVID-19 no kugabanya igipimo cy’ubukene bwakajijwe n’icyo cyorezo.
Ako karere kanazahajwe bikomeye n’ihindagurika ry’ibihe kandi iyo ndahiro ya miliyari 80 z’amadolari yarahiwe ku ncuro ya mbere n’ibigo “Development Finance Institutions” (DFI) byo muri Leta zunze ubumwe z’Amerika, Ubulayi no mu bindi bihugu byo mw’itsinda rya birindwi (G7) bikungahaye kw’isi, byiyemeje hamwe, gufasha umugabane w’Afurika.
Iyi ntambwe itewe mu gihe ibihugu byo mu burengerazuba bw’isi, bihagurukiye guhangana n’Ubushinwa hamwe n’Uburusiya, ibihugu birushaho kuvuga rikijyana mu bijyanye na politiki n’ubukungu muri Afurika.
Indahiro yo kuri uyu wa mbere yabaye nyuma y’uko mu mpera z’icyumweru, ibihugu birindwi bikungahaye kw’isi, byijeje miliyari imwe y’inkingo za COVID-19, ibihugu bikennye kurusha ibindi kw’isi kuri uyu mwaka utaha. Hari n’amakuru avuga ko ibyo bihugu birimo kureba uko miliyari ijana z’amadolari, ikigega mpuzamahanga cyateganyirije ibihe bikomeye, yazashyirwa mu kuzahura ubukungu.
Facebook Forum